1 Yoane 2 - Lobala

Klisto ali avoka wa ɓanga

¹ Ɓana ɓanga, naekomele ɓaɓona phɔ ɓɛ̀ɛ sakyela masumu. Kasi ɓo mɔnɔmɔ na ɓɛ̀ɛ anikyela isumu, toli na avoka mɔnɔmɔ oka Tata, eli Yesu Klisto, oli moto wa ɓosembo.

² Phɔ yo ali mbeka phɔ ya masumu ma ɓanga. Teembi ɓa phɔ ya masumu maka ɓanga na ɓanga, kasi na phɔ ya ma mokyisi mobimba.

Kumola moɓeko ŋwa lozingo

³ Emba na ɓomɔ, toanole oɓokye tomoeɓe: Ɓo tokumole miɓeko mɛ.

⁴ Moto okowɔ oɓokye: «Namoeɓe», kasi takumole miɓeko mɛ, ali moto wa ɓɔɔlɛ, na maphɔɔ maphɛlɛ temali onte yɛ.

⁵ Kasi moto okoɓanza Iloɓa sɛ, nde phɛlɛ, onte yɛ, lozingo la Ŋwaphongo lowɛnɛɛ. Na ɓomɔ, toeɓe oɓokye toangana nɛ.

⁶ Moto okomitate oɓokye aangana na Ŋwaphongo, esengyesi oɓokye atambule yo mampenza o manzela matambulaka Klisto.

⁷ Ɓɛbi na nga ɓa lozingo, moɓeko moekomele nga temoli munyakune, kasi moɓeko ŋwa kalakala, ŋwazwa ɓɛ̀ɛ uta o etatele. Moɓeko mɛ ŋwa kalakala, eli Iloɓa saoka ɓɛ̀ɛ.

⁸ Naɓo ɓaɓona, eli moɓeko munyakune moekomele nga — yango eli phɛlɛ onte yɛ na onte ya ɓɛ̀ɛ — phɔ enzɔmbi kyemane na ŋwakolo moo moombo ngala.

⁹ Moto okomitate oɓokye ali o moo, bibi kaine nwɛbi nɛ, ali o enzɔmbi.

¹⁰ Okozingye nwɛbi nɛ ali o moo, tali na ná ekpele yɔnɔyɔ onte yɛ phɔ ya imoɓakyitinya.

¹¹ Kasi moto okoine nwɛbi nɛ ali o enzɔmbi, katambule onte ya enzɔmbi tambe naeɓa biikyɛ yo, phɔ enzɔmbi emozibi miyo.

Moanosi o ɓoo pha mokyisi na ɓaatɛmɛlɛ Klisto

¹² Ɓana ɓa nga, naekomele lango phɔ: «Masumu ma ɓɛ̀ɛ malimbisami phɔ ya nkombo yɛ, yo Yesu.»

¹³ Ɓatata, naekomele lango phɔ: «Koeɓe oli uta o etatele.» Ɓanzenga, naekomele lango phɔ: «Olongyi moto moɓe.»

¹⁴ Ɓana ɓa nga, naekomele lango phɔ: «Koeɓe Tata.» Ɓatata, naekomele lango phɔ: «Koeɓe oli uta o etatele.» Ɓanzenga, naekomele lango phɔ: «Oli ɓakamba, na Iloɓa sa Ŋwaphongo sili na ɓɛ̀ɛ, oli na ɓalongyi ɓa moto moɓe.»

¹⁵ Sazinga mokyisi naa ili o mokyisi. Ɓo moto kazingye mokyisi, lozingo la Tata teloli nɛ,

¹⁶ phɔ isɔ ili o mokyisi — phowa ya nzoto, phowa ya miyo, na lolɛndɔ la imiambya o mbolo ya mokyisi — teyute na Tata, kasi kyiute na mokyisi.

¹⁷ Nzuka mokyisi ŋwamolekana, iyo na maphowa mɛ. Kasi moto okokyele ɓoozingyi Ŋwaphongo amoɓa phɔ ya ɓoɓɛlɛ.

¹⁸ Ɓana ɓa nga, eli imbɛlɛ sa mbomela. Waoka ɓaimole oɓokye motɛmɛsi wa Klisto kaye. Nzuka tata uŋwaŋwa eye, ɓatɛmɛsi ɓa Klisto ɓali. Na ɓɛ̀ɛ toeɓe oɓokye eli imbɛlɛ sa mbomela.

¹⁹ Ɓatɔkɔlɔ nde oka ɓanga, kasi teɓaɓaka ɓa ɓanga. Ɓo ɓaɓaka ɓa ɓanga, nde ɓaikalaka na ɓanga. Kasi esengyelakyi oɓokye amiwɛninya oɓokye ɓato ɓasɔ, na ɓo ɓali, teɓali ɓa ɓanga.

²⁰ Kasi phɔ ya ɓɛ̀ɛ, wazwa mauta maeyinga Ɓolɔɓɔ, na ɓɛ̀ɛ ɓasɔ koeɓe.

²¹ Sikyi ekomela oɓokye toeɓe maphɔɔ ma phɛlɛ, kasi oɓokye komaeɓe, na oɓokye lowɔ losɔ loli la ɓɔɔlɛ teloute na maphɔɔ ma phɛlɛ.

²² Moto wa ɓɔɔlɛ eli nza, ɓo teɓe moto okoangane oɓokye Yesu tali Klisto? Kyeka motɛmɛsi wa Klisto, moto akoangane Tata na Ŋwana.

²³ Moto munsɔ okoangane Ŋwana aanga na Tata. Ka okoanole Ŋwana aanosi na Tata mɛ.

²⁴ Phɔ ya ɓɛ̀ɛ, simo eyaoka ɓɛ̀ɛ uta o etatele eɓe na ɓɛ̀ɛ. Ɓo eɓe na ɓɛ̀ɛ, simo eyaoka ɓɛ̀ɛ uta o etatele, na ɓɛ̀ɛ, wamoɓa na Ŋwana na ná Tata.

²⁵ Mɛna eli mbunu eya elakyela yo mampenza: Ɓomɔɔ pha ɓoɓɛlɛ na ɓoɓɛlɛ.

²⁶ Kyeka lolukakyi nga ekomela phɔ ya ɓato ɓalukye iyekatela.

²⁷ Phɔ ya ɓɛ̀ɛ, mauta maeyinga yo mali na ɓɛ̀ɛ emba tosengyesi oɓokye ɓaeteya. Kasi phɔ mauta mɛ maeteya o maphɔɔ masɔ, — emba mauta mɛ mali ma phɛlɛ temambe na kata —, phɔ maeteya, oli nɛ.

²⁸ Yango mɛna, ɓana ɓa nga, ɓa nɛ, phɔ wamotɔkɔlɔ yo, toɓe na sakolo ianola emba ɓanga satonda na sɔɔ itakye nɛ, imbɛlɛ saamoya yo.

Ɓa na ɓosembo, sakyela masumu

²⁹ Phɔ ɓɛ̀ɛ koeɓe oɓokye ali moto wa ɓosembo, eɓa oɓokye moto munsɔ oli nɛ na ɓosembo, aɓotama nɛ.