Zekaria 6 - KITABU KITAKATIFU

Malola ga magare gane gu vulwani

¹ Ndahenza kandi nindora magare gandi gu vulwani gane gaturaa hagati hivigulu viviri viu mugasa.

² Zibarasi zinzakanyu ziali nizing'usaa ligare liu kutanga; zibarasi zimwamu ziali nizing'usaa ligare lia kaviri.

³ Zibarasi zindavu ziali nizing'usaa ligare lia kavaga; zibarasi zio vodondonye ziali nizing'usaa ligare lia kane.

⁴ Maku ndateeva engelosi, “Mwami wange, magare gu vulwani yaga gavoora ki?”

⁵ Yandivulira, “Yizi nizimbuuza zine zimali kuuza kutura imbiri wa Yahova wikivala choosi.”

⁶ Zibarasi zimwamu ziang'usaa ligare ziaziza Ivaale wa Babiloni, zibarasi zindavu ziaziza Imadioli kandi zibarasi zio vodondonye ziaziza mukivala chi Isavaalu.

⁷ Lwi zibarasi ziovodondonye ziaza, siziali ni liekuzira kuzia kohenza kivala mba. Engelosi yavoola, “Zimuhenze kivala!” Kandi ziakola ndio.

⁸ Maku engelosi yambanzukira, “Zibarasi ziziyi Ivaale wa Babiloni zia homatiza vutima vwa Yahova.”

Lilago liu Kuviika Joshua Igudwa

⁹ Yahova yambolera makuva yaga,

¹⁰ “Vugula vihaanwa via vahambe Helidai, Tobija na jedaya vahaani, ma uzie vwangu hango ha Joshua mwana wa Zefania. Avasaza yava vosi vamali kwirana kutura mu kivala chu vuhambe cha Babiloni.

¹¹ Olombe igudwa kutura ku ifeza ni zahabu yavamali kuhaana, ma uviiki kumutwi gwa Joshua musaalisi munene, muyaayi wa Jehozadaki.

¹² Mumuvolere ndi Yahova Wuvunyali avoora, ‘Mundu ulangwa Ulusia alavilukila havundu ha aveeye, kandi alumbaka vuhia Litembeli lia Yahova.

¹³ Niye ulakaliumbake kandi alakanyoole luyali luduukanaa mwami; kandi alakamiihi avandu veve. Musaalisi alakave kondeve yu vwami vwivwe, kandi valakakole miyinzi harara naye mu mirembe kandi mu lihambana.’

¹⁴ Igudwa yiyi ilakave mu Litembeli lia Yahova kuli chukwizuliziraku Helidai, Tobija, Jedaya na Josia muyaayi wa Zefania.”

¹⁵ Avasaza vamenyi ihale valakaze kokonyana kwumbaka vuhia Litembeli lia Yahova. Lwa navave ni vakumbaka Litembeli vuhia, ulakamanye ndi Yahova Wuvunyali yanduma kuivi. Yaga galakakoleke goosi niiva mulakatie ligali malago ga Yahova Nyasaye winyu.