Zekaria 4 - KITABU KITAKATIFU

Muporofeti Yalora Amalola gi Kinaara Chitaaya

¹ Engelosi waali namolomangi ninzi yaza kandi niyambukiza, kuli mundu avukizwa mu zindolo.

² Yandeva “Olola kindiki?” Ndaamutivulira, “Kinaara chitaaya chalombwa kuzahabu; ibakuli ya maguta yaali kwigulu kwacho. Kwigulu kwi kinaara chitaaya yiki kwaliku ni zitaya 7. Vuli itaya yaali na havundu hi zindambi 7.

³ Kulovega lwi kinaara chi taya haali ho ni misaala ja Muzeituni 2; mulala ku vuli lovega.”

⁴ Maku ndateeva engelosi, “Mwami wange vindu yivi vivoolaki?”

⁵ Yandeva “Ivi umanyi mba?” Ndamutivulira, “Awa, mwami wange Inzi si mbimanyi mba.”

^10b Engelosi yambolera, “Vinrara 7 yivi viveeye zimoni 7 zia Yahova atumikiraa kohenza kivala choosi.”

¹¹ Maku ndamuteva, “Misaala 2 ja Muzeituni ku vuli lovega lwi kinaara chitaaya jivoolaki?

¹² Zisia 2 zia Muzeituni ku vuli lovega lwi vidundu 2 vie zahabu viu kwitulira maguta ga Muzeituni zivoolaki?”

¹³ Yandeva “Ivi ukikiri kumanya?” Ndamutivulira, “Mwami wange Inzi si manyi mba.”

¹⁴ Maku yavoola, “Yava na vasaza 2 va Nyasaye amali kotovola nu kuvavaka maguta vaduuki kutumikira Yahova wi kivala choosi.”

Lilagana lia Nyasaye ku Zerubabeli

⁶ Maku engelosi yambolera kuhaana makuva yaga ku Zerubabeli kutura ku Yahova: “Ulanyaliza, na si gaveeye kigira vunyali vuvwo anoho kigira zinguru zizio mba, navuzwa gaveeye kigira Roho wange Yahova wamahi avoora.

⁷ Uvudinyu voveeye kuli kiguru kenene, vulagota kutura imbiri woovo. Ulumbaka vuhia Litembeli na lwa uva nuviika ligina lio kumalirika mu vogono yivwo, avandu valahanzuka nokovoora nu mwoyo munene, ‘Vulahi ligali, vulahi ligali!’ ”

⁸ Yahova yambolera kandi,

⁹ “Zerubabeli umali ku viika muse gwi Litembeli, kandi alamaliriza kuliumbaka. Lwayaga gekoleka, avandu vange valamanya ndi ninzi umali kukutuma kuvo.

¹⁰ Valavihilirwa kigira miyinzi sijizizagiliraa vulahi mba. Navuzwa valalola Zerubabeli nazizagilira kwumbaka Litembeli, navalava nuvusangali.”