Zekaria 2 - KITABU KITAKATIFU

Malola gu Mugoye gwo Kogerera

¹ Mu malola gandi, ndaalora mundu naveeye nu mugoye gwo kogera nigoveeye mu mukono gwigwe.

² Ndamuteva, “Uzizaa hayi?” Yandivulira, “Nziza kogera Jerusalemi kumanya lidaala yili liveeye vutambi ki, kandi liveeye vuvambalaru ki?”

³ Maku ndaalora engelosi waali namolomangi ninzi niyisunda hambiri, kandi engelosi wundi yaza kumwaganira.

⁴ Engelosi wukutanga yavolera engelosi ya kaviri, “Nyagura, ovoolere musoleri oveeye nu mugoye gwo kogera ndi kuziiza kuva na vandu vanyingi kandi ni mitugu minyingi mu Jerusalemi; kandi lidaala lilava linene ligali. Sinalive namadigi gu kulikinga mba.

⁵ Yahova umali kulaga ndi mwene alava lidigi liu muliru kulikumbiriza kandi kulikinga. Alamenya mu lidaala yili nu vukumi vwivwe vwosi.”

Avasalanywa Valangwa Kwirana Yengo

⁶ Yahova yavolera vandu veve, “Hambi! Mwiluki kutura mu kivala chi Ivaale kigira inzi mali kumusalanyia mu zimbega ziosi zie kivala.

⁷ Mwiluki kutura Babiloni na mwilane Jerusalemi.

⁸ Mundu woosi ukuduka amanyirizi ndi aduyaa endolero yemoni yeeye.” Kunangwa Yahova Wuvunyali yanduma na makuva yaga ku zihiiri ziali ni zialanya vandu veve.

⁹ “Yahova mwene alamulwaana, kandi avandu vaali vatumikiri vovo maziambiri, valamuhira mu vuhambe.” Lwayaga galiekoleka, vuli mundu alakamanye ndi Yahova Wuvunyali yanduma.

¹⁰ Yahova yavoola, “Mwimbi nu vusangali munyi avandu vamenyi mu Jerusalemi! Nziza komenya hagati hinyu!”

¹¹ Ing'inga yeyo, zihiiri zinyingi zilakaze ku Yahova kandi zilakave avandu veve. Alakamenye hagati hinyu, kandi mulakamanye ndi yanduma ku munyi.

¹² Avandu vi Ivuyuda kandi valakave vatovole va Yahova mu kivala chiche kitakatifu. Jerusalemi lilakave lidaala linene lia nayaanze kuvita madaala gandi goosi.

¹³ Vuli mundu akiring'ane imbiri wa Yahova, kigira yaazaa kutura hatakatifu hehe.