Zekaria 14 - KITABU KITAKATIFU

Liamiiha lia Yahova

¹ Lidiku liveeye ahimbi lia Yahova alakahaane likalaga. Lidaala lia Jerusalemi lilakalanywe na vilaanye vilakagavulanywe imbiri winyu.

² Yahova alakaleete zihiiri ziosi harara kulwaana Jerusalemi. Lidaala linene yili lilakavugulwi, zinyumba zialio zilakalanywe, na vandu vasaza valakonogonye vakali. Inusu ya vandu vamenyi mu valakazie mu vuhaambe, navuzwa valitigala sivalakatulizwi mu lidaala linene mba.

³ Maku Yahova alakatuli nu kulwaana zihiiri yizio kuli yakola maziambiri.

⁴ Ing'inga yeyo, Yahova alakasingiri ku kiguru cha muzeituni Ivugwi wa Jerusalemi. Maku kiguru yiki kilakagavukanywe mu haali kaviri, Ivugwi ni madioli. Kilakagavukanywe ni livona linene. Inusu yi kiguru yiki kilakisundi Ivaale kandi inusu kilakisundi Isavaalu.

⁵ Mulakiluki ni muvitiraa mulivoona yili liagavula kiguru mu vidonye viviri. Mulakiluki kuli vaguuga vinyu vaakora lwi kivala chadegera ing'inga yu mwami Uzia yamiha kivala chi Ivuyuda. Maku Yahova Nyasaye wange alakaze harara ni zingelosi veve vosi.

⁶ Lwi ing'inga yeyo iduuka, sihalakaveho nu vukindu anoho lime mba,

⁷ anoho kisundi mba. Muvasu gulakave ho ing'inga yoosi kali ing'inga yu vudiku. Yahova weng'ine niye umanyi lwa yaga galakekoleke.

⁸ Lwi lidiku yili liliduuka, mazi gilivamwoyo galakituruki kutura Jerusalemi, inusu yago galakazie mu inyanza yi jumbi, na inusu yindi galakazie mu inyanza ya Meditareniani. Amazi yaga galakituruki muhiga gwosi mu ing'inga yi kemeyu kandi mu ing'inga yi mbula.

⁹ Maku Yahova alakave mwami wi kivala choosi; vuli mundu alakamusigamiri kuli Nyasaye kandi nu kumanya lieta lilie.

¹⁰ Losoma lwosi kutura Geba kolovega lwi Ivaale wa Rimoni kolovega lwi Isavaalu vilakaleng'anywe. Jerusalemi ilakave igulu wi kivala cha kikumbeliza; lidaala liene yili lilakatuli mu kirivwa cha Benjamini kuduuka ha kirivwa chu mukoona, hi kirivwa kindi chaalange; kandi hu munara gwa Hananeli kuduuka ha vaminiraa iwaini yu vwami.

¹¹ Avandu valakamenye wene yeyo mu lielemeriza, sivalakatihizwi kandi ni lidivizwa mba.

¹² Yahova alakaleete vulwaye vudamanu ligali ku zihiiri zilileta vulwani ku Jerusalemi. Miviri jaavo jilakagundi nivakikiri mwoyo; zimoni ziavo kandi zinimi ziavo zilakagundi.

¹³ Ing'inga yeyo Yahova alakavagoyanye; na vuli mundu alakave nuvuti ligali nu kulwana wache uliva himbi naye.

¹⁴ Avasaza vi Ivuyuda valakalwaane no kosoola Jerusalemi. Valakavuguli vutugi vwi zihiiri zindi kuli vilaanye, vindu kuli izahabu, ifeza kandi zinguvu zinyingi.

¹⁵ Vulwaye vudamanu ligali vulakaze ku zibarasi, zisukiri, zing'amia, kandi zibunda, kandi ku zinyama ziosi zia vasigu hokososa haavo.

¹⁶ Maku vosi avalihononoka kutura mu zihiiri zilikave ni zingiliye Jerusalemi, valakazie wene yeyo vuli muhiga kusigamira Yahova Wuvunyali kuli mwami. Valakave ni lisavo lia madiri.

¹⁷ Niiva ihiiri ilakasuuli kuzia kusigamira Yahova Wuvunyali kuli mwami, si valakanyore imbura mu kivala chavo mba.

¹⁸ Niiva vandu va Egebeti valasura kusangalira lisavo lia madiri, valakuywa nu vulwaye vwa Yahova alakatumi ku vuli ihiiri ilakasuuli kuzia mu lisavo yili.

¹⁹ Yaga nigo amageri galiduuka ku vandu va Egebeti kandi ku zihiiri zilivula kuva ni lisavo lia madiri.

²⁰ Ing'inga yeyo, kali zigengere zie lijamu lie zibarasi zilakang'odwe ku mang'oda yaga, “CHATAKASWA KU YAHOVA”. Zinyingu zio kodekera mu Litembeli zilakave zindakatifu kuli viju viveeye imbiri wu vwali.

²¹ Vuli inyingu yo kodekera mu, mu lidaala lia Jerusalemi kandi Ivuyuda woosi ilakatakaswe nu kugitumikira mu lisigamira Yahova Wuvunyali. Avandu vahaana visiuviliru valakadekere mu inyama yi visiuviliru. Lwi ing'inga yeyo ilakaduuki avakiranyi sinavaveho kandi mu Litembeli lia Yahova Wuvunyali mba.