Zekaria 12 - KITABU KITAKATIFU

Liguuta lia Jerusalemi

¹ Yili ni likuva kutura ku Yahova kigira Isiraeli, Yahova walomba ligulu ni lirova, kandi wahaana livamwoyo ku mundu avoora,

² “Ndakakole Jerusalemi kuva kuli kekombe chi iwaini; zihiiri ziosi zikumberizaa lidaala yili zilakanwi waini kandi zilakageende no koyekayeka kuli avandu vahambiku. Lwa navingiliri Jerusalemi, madaala gandi goosi gi Ivuyuda galakingilirwi.

³ Navuzwa lwi ing'inga yeyo ilakaduuki, ndakakole Jerusalemi kuva kuli ligina lilitu, ihiiri yoosi ilakagelizi kulinginga ilakasaliri. Zihiiri ziosi ziekivala zilakahambane kwingilira Jerusalemi.

⁴ Ing'inga yeyo ndakakole zibarasi vaavo ziosi kuva nuvuti kandi ndakakole vahiri vazio vosi kuva valalu. Ndakalindi avandu vosi vi Ivuyuda, navuzwa ndakavakulizi zibarasi zia vasigu vaavo.

⁵ Maku zihiiri ziosi zie Ivuyuda zilakevoolere, ‘Yahova Nyasaye Wuvunyali ahaanaa zinguru ku vandu veve avamenyi mu Jerusalemi.’

⁶ “Ing'inga yene yeyo ndakakole zihiiri zie Vuyuda kuva kuli inyingu eveeye ku lomemo liumuliru hagati hu mulitu, anoho kuli muliru hagati hu mulimi gwu vuswage vwumu; muliru gulakadivizi zihiiri ziosi ziavakumberiza. Avandu va Jerusalemi valakamenye mu mirembe mu lidaala linene.

⁷ “Inzi Yahova ndakahaane liguuta ku mahi gi Vuyuda kutanga, kunangwa luyali lwi visukululwi via Daudi kandi avandu va Jerusalemi valakanyore, si lulakave lonene kuvita lwi Ivuyuda yoosi mba.

⁸ Ing'inga yene yeyo, ndakasole yavo avamenyi mu Jerusalemi, kali yavo avaveeye avadedekere hagati haavo, valakave ni zinguru kuli Daudi yaali. Visukululwi via Daudi vilakavimiliri kuli engelosi wa Yahova Nyasaye kuli mwene.

⁹ Ing'inga yene yeyo ndakadivizi vuli ihiiri ilakagelizi kwingilira Jerusalemi.

¹⁰ “Ndakahaane ku visukululwi via Daudi harara na vandu vandi va Jerusalemi Roho wi zimbavasi kandi Roho wi lisaala. Valakahenze ku oyo wavatoza nakuza, kandi valakamusiomere kuli mundu asiomeraa mwana weve mudelwa. Valakasiome vululu kuli yavo avasiomera mwana wavo muyaayi wukutanga wa vamali kogotiza.

¹¹ Ing'inga yene yeyo lisioma mu Jerusalemi lilakave linene ligali kuli lisioma lia ‘Hadadi Rimoni’ mu kereremo cha Megido.

¹² Avandu vi kivala valakasiome, vuli ihiiri ku lwayo harara na vakali vaavo, ihiiri ya vandu va Daudi harara na vakali vaavo, ihiiri ya vandu va Nazani harara na vakali vaavo.

¹³ Ihiiri ya vandu va Levi harara na vakali vaavo, ihiiri ya Shimei harara na vakali vaavo,

¹⁴ kandi zihiiri zindi ziosi zitigaye harara na vakali vaavo.”