Zekaria 11 - KITABU KITAKATIFU

Liguutwa Lia Vasigu va Isiraeli

¹ Mwiguli viliango vienyu, O, Lebanoni, kunangwa muliru guduuki kusamba ligali misaala ji midaragwa jinyu!

² Muliri kandi musiome, misaala ja makaratasi, kigira midaragwa jimali kugwa; misaala milahi jokogenyia jimali kudivizwa! Muliri kandi musiome misaala minene ja Bashani, kigira mulitu gwi misaala minyingi gumali kotemagwa!

³ Avamihi valira no vovereri; kigira vukumi vwavo vumali kudivizwa! Hulirizi ku lihuuma lie zisimba, kigira mulitu goveeye vomenyo vwazio mu Jorodani gumali kudivizwa!

Avayi Vaviri

⁴ Yahova Nyasaye wange yambolera, “Waye chayo cha magondi gazizaa kwitwa.

⁵ Aveene magondi yaga vagitaa, navuzwa sivalanyora mageri mba. Vaguliza zinyama ziago nivavoora, ‘Yahova yizominywi kunyi koveeye avatugi!’ Kali avayi vago sivaveeye ni zimbavasi kugo mba.”

⁶ Yahova yavoola, “Sindazizagilira kuva ni zimbavasi ku mundu woosi mu kivala mba. Ndaviika vandu vosi mu zinguru zia vamiihi vaavo. Avamihi yavo valaduvaga vandu vu mu kivala, kandi sindakakihonye kutura mu zinguru ziavo mba.”

⁷ Yavo avakolaa likiranya lia magondi vambugura kuvayira, kandi ndagwa mwayi wa magondi gaziza kwitwa. Ndaavugura zimbimbu ziviri; indala ndaagigulika “Kuyaanzilira” ni yindi ndaagigulika “Uvuhambani.” Ndaaya magondi.

⁸ Si ndaali ni liekuzira na vayi vandi vavaga avandunyira mba. Ndavadiviza vosi ku mweli mulala.

⁹ Maku ndavolera chayo cha magondi, “Inzi si ndava mwayi winyu kandi mba. Yago agenyi kukuza, gakuzi, kandi yago agenyi kudivizwa, gadivizwi. Yago agatigala galiitana.”

¹⁰ Maku ndaavugura imbimbu yagulikwa “Kuyaanzilira” nimbunaganya kunangwa nduuki kutulizaho lilagana lia Yahova yaali nalombi nizihiiri ziosi.

¹¹ Maku lilagana liatulizwaho lidiku yilio, na yavo avakolaa likiranya lia magondi vambenzaa kandi vamanya ndi Yahova ya molomaa kuvitira mu vindu viandakolaa.

¹² Maku ndavavolera, “Nigaveeye malahi ku munyi, mundungi mitungu jange; navuzwa nigataveeye malahi muvenajo.” Kunangwa vaamba vidonye 30 vie ifeza kuli mitungu ku vuyinziri vwange.

¹³ Yahova yambolera, “Uziviiki mulivikiru lie Litembeli” kunangwa ndavugura vidonye 30 vie ifeza, mabese malahi gavasuuviraa vaduukana vambe kuli mitungu maningaviika mu livikilu lie litembeli

¹⁴ maku ndavunaganya imbimbu yakaviri, yalangwa “Uvuhambani” Hene yaho vuhambani vwi Ivuyuda na Isiraeli vwagota.

¹⁵ Maku Yahova yambolera, “Okole kandi kuli umwayi, ing'inga yiyi ove mwayi utinyaliza.

¹⁶ Mali kuviika mwayi kulinda chayo cha magondi, navuzwa siakonyaa magondi gaveeye ahimbi kudivizwa mba, anoho siahenzaa agagotaa mba, anoho kohonya agasalirizwa, anoho kulihiza malamu mba. Muvugono yivwo alizaa zinyama zia magondi gaveeye makomelu kandi nu kutandura zimbagayu zia go.

¹⁷ O, vayaayi, kilaamo keveeye ku mwayi utinyalizaa umali koleka chayo chiche! Uvulwani vulakadivizi zinguru zizie ziosi. Mukono gwigwe gulakuumi, kandi emoni yeeye inungi ilakavakuli.”