Zekaria 10 - KITABU KITAKATIFU

Yahova Yalaga Vovoholore

¹ Muteeve Yahova imbura mu ing'inga yu kutaga mu muhiga. Yahova atumaa malesi gimbula kandi agikubiza, ma emeliza milimi ku vuli mundu.

² Vandu vateva vifananyi vivavuuliri, navuzwa mativuli ga vanyoola gaveeye go vovehi kandi gavuzwa. Valala vivalaa maloto cha gavoora, navuzwa vamugotizaa; vweremerizi vwa vamuheza voveeye vwa vuzwa. Kunangwa vandu vagendagenda kuli magondi gagota. Vaveeye mu vudinyu kigira sivaveeye nu mwimiliri mba.

³ Yahova avoora, “Mbeeye nu vutima na vageni vamiiha vandu vange kandi nziza kuvaha mageri. Avandu vi Ivuyuda vaveeye vandu vange, kandi inzi Yahova Wuvunyali ndakavalindi. Valakave kuli zibarasi ziange zie liihi zie zinguru.

⁴ Avamihi aviimiliri, na vahaani va malago, valakatuli muvo; avalakamiihi avandu vange.

⁵ Avandu vi Ivuyuda valakaguuti kuli vasikari vaduvagira vasigu vaavo mu madohi gizinzira. Valakalwaane kigira Yahova aveeye harara navo, kandi valakaguuti kali avasigu valiva ku zibarasi.

⁶ “Ndakahaane zinguru ku vandu vi Ivuyuda. Ndakasole avandu va Isiraeli. Ndakavaveere zimbavasi kandi ndakaviranye yengo. Valakave kuli avandu vandavula kusuura. Inzi ni Yahova Nyasaye wavo, ndakahaane mativuli ku lisaala liavo.

⁷ Avandu va Isiraeli valakave ni zinguru kuli vasikari, valakave nu vuyanzi kuli avandu vamali kunwa iwaini, visukululwi viavo vilakizulizi liguuta yili, kandi valakave nu vuyanzi ku ga inzi Yahova mali kokora.

⁸ “Ndakalange vandu vange nukuvaviika harara. Ndakavasoole kandi valakave vanyingi ligali kuli valange kale.

⁹ Kali niiva ndaavasaalanyia hagati hi zihiiri, kali muvivala viehale, valakanzizulizi. Valakahononoke harara na vana vaavo, kandi valakilane yengo harara.

¹⁰ Ndakavaleete yengo kutura Egebeti kandi kutura mu kivala cha Asiria; Kandi ndakavaviiki mukivala chavo. Ndakavaviiki mu kivala cha Gileadi kandi kivala cha Lebanoni. Kivala choosi kilakave na vandu vanyingi.

¹¹ Lwa navavitiri mu inyanza yi kivi, inzi, Yahova, ndakakiling'anye viguvuli kandi mugera gwa Naili gulakakame. Liegingira lia vandu va Siria lilakikizwi, kandi vandu va Egebeti vi zinguru valakagotizi zinguru ziavo yaga.

¹² Ndakahaane zinguru ku vandu vange; valakasigamiri kandi valakatie inzi.” Yahova umali kovora.