Zekaria 1 - KITABU KITAKATIFU

Yahova Yalanga Vandu Veve Kwirana Kuye

¹ Mu mweli gwa munane, mu muhiga gwa kaviri lwa Dariasi yaali mwami wi kivala cha Pasia, Yahova yahaana makuva yaga ku muporofeti Zakaria, muyaayi wa Berekia, waali mwisukulu wa Ido.

² Yahova Wovunyali yavolera Zakaria avolere avandu ndi, “Inzi Yahova, ndaali nu vutima vunyingi ligali na vaguuga vinyu,

³ navuzwa kalunu muvooleraa ‘Mwilane ku inzi, na inzi ndamwilanira.

⁴ Mutava kuli avaguuga vinyu mba. Avaporofeti vavavolera kale makuva gange, nivavavoolera valeke vudamanu, kandi vavuli komenya mu vwoni. Navuzwa si vambulira anoho kutia inzi mba.

⁵ Avaguuga vinyu kandi avaporofeti yavo sivaveeye mwoyo mba.

⁶ Kuvitira mu vaporofeti vatumikiri vange, ndahaana ku vaguuga vinyu malago kandi lieganihiza, navuzwa vagachaya ma nivasaalira kigira likora liavo. Maku, viganira kandi vambugilira ndi: Inzi Yahova Wovunyali, ndaali nimbani kuvo mageri kuli gavadukiraa kandi kuli ndaali nindovoye kokora.’ ”

Amalola gu Muporofeti gi Zibarasi

⁷ Mu muhiga gwa kaviri lwa Dariasi yaali mwami lidiku lia 24 liu mweli gwa 11 mweli gulangwa Shebati, Yahova yahaana ku inzi makuva yaga mu malola vudiku.

⁸ Ndaalora mundu kubarasi inzakanyu. Yaali nasingiyi hagati hi misaala imimbi mu livona, kandi haali ho ni zibarasi zindi inyima weve zinzakanyu, zio vodondonye, kandi zindavu.

⁹ Ndamuteva, “Mwami, zibarasi yizi zivoolaa ki?” Yativura navoora, “Ndakumanyia cha zivoolaa.”

¹⁰ Mundu yasingira mu misaala mimbi yiivara navoora, “Yahova yazituma kogenda no kohenza kivala.”

¹¹ Zibarasi ziavoolera engelosi ya Yahova waali nasingiyi hagati hi misaala ndi, “Kumali kogenda mu kivala choosi kandi konyooye lirova liosi liveeye nu vweremerizi kandi liveeye ni mirembe.”

¹² Maku engelosi yavoola, “Yahova Wuvunyali waveyange nu vutima ku Jerusalemi kandi ku madaala manene gi Ivuyuda ku mihiga 70, kalunu ulavugula ing'inga ki nukikiri kuvaveera zimbavasi?”

¹³ Yahova yativulira engelosi makuva go koleminya mwoyo.

¹⁴ Engelosi yambolera kovora cha Yahova Wuvunyali yaali navooye: “Ndayaanza Jerusalemi ligali, lidaala liange Litakatifu.

¹⁵ Navuzwa mbeeye nu vutima vunyingi ligali ni zihiiri zisangaliraa vweremerizi ni mirembe. Lwa ndaali nengehizi vutima vwange ku vandu vange, zihiiri yizi ziameeda vusaliri ku vandu vange.

¹⁶ Kunangwa inzi mali kwirana mu Jerusalemi no kovererera lidaala linene. Litembeli liange lilumbakwa vuhia. Lidaala linene lilumbakwa kandi.”

¹⁷ Engelosi yambolera kandi mbore ndi, “Yahova Wuvunyali avoora ndi, madaala geege manene galava kandi ni ingavi yu vutugi kandi alakonya Jerusalemi nu kulivugula kuva lidaala lilie.”

Malola gi Zinziga

¹⁸ Ndaalora zinziga zine zie zinziga mu malola gandi.

¹⁹ Ndateeva engelosi yaali nimolomangi ninzi, “Zinziga yizi zivoolaa ki?” Engelosi yativura nivoola, “Zinziga yizi ziveeye mu vogono vwi zihiiri ziasalanyia vandu vi Vuyuda, Isiraeli na Jerusalemi.”

²⁰ Maku Yahova yamanyia vasaza vayinziri vane avaveeye ni zinyundu.

²¹ Ndateeva, “Avasaza yava vazi kokora ki?” Yandivulira navoora, “Vazi kutihiza kandi kuguuta zihiiri zingiliraa nukuduvaganyia kivala chi Ivuyuda kandi zisalanyia vandu vacho.”