Zefania 1 - KITABU KITAKATIFU

¹ Yaga na makuva ga Yahova yahaana ku Zefania muyaayi wa Kushi mwisukulu wa Gedalia, chisukululwi cha Amaria kandi kesoni chu mwami Hezekia. Yiyi yaali ing'inga lwa Josia muyaayi wa Amoni yaali mwami wi Vuyuda.

Lieganihiza lie Lidiviza lia Yahova

² Yahova yavoola “Nziza kudiviza vuli kindu choosi ku lirova.

³ Ndakadivizi avandu harara ni zinyama, manyonyi goosi; kandi zisuzi ziosi. Ndakagwihizi vandu vachamu. Ndakadivizi avandu vosi mu kivala. Inzi Yahova mali kovora.

⁴ “Ndakahaane mageri ku vandu va Jerusalemi halalani Ivuyuda. Ndakonogonyie vandu vosi avasigamiraa Baali. Sialakaveho nu mundu kali mulala ulakizulirizi avasaalisi vi vifananyi avatumikiraa Baali mba.

⁵ Ndakadivizi vuli mundu woosi ulakanini ku inyumba igulu nu kusigamira liuva, umweli kandi zing'ereng'ani. Ndakadivizi yavo avasigamiraa kandi aviisuhaa kuhaana ku inzi luyali, kandi visuha mulieta liumunyasaye Moleki.

⁶ Ndakadivizi yavo aviranaa inyima kandi yavo avavuraa kuuza ku inzi anoho avavuraa kondeeva kuvimilira.”

⁷ Lidiku liveeye ahimbi lia Yahova ahaanaa likalaga, kulwayago muchiring'ane imbiri weeve. Yahova alohizaa kuhaana vandu veve kuli kisiuviriru, kandi umali koleta vasigu kwingilira kivala chi Ivuyuda.

⁸ Yahova avoora, “Mu lidiku liu kwita yilio, ndakahaane mageri ku vimiliri, vana vayaayi vavami kandi vosi avalondaa miima ja vandu vageni.

⁹ Ndakahaane mageri ku vosi avasigamiraa vifananyi kandi yavo avivaa nu kwiita kunangwa vaduuki kwizuliza zinyumba zia vami vaavo ni vindu via valanyi.”

¹⁰ Yahova avoora, “Kulidiku yilio, mulakahuliri ulwanga ha kirivwa chizuzi mu Jerusalemi. Mulakahuliri lisioma kolovega lwiluhia wi lidaala linene, kandi lwanga lwi liyoga linene mu vigulu.

¹¹ Musiome kandi muliri lwa muhulira yaga, munyi avandu vamenyi kolovega lwindangu wi lidaala linene kigira vakiranyi vosi valakave ni vakuzi.

¹² “Ing'inga yeyo ndakavuguli itaya nu kwenyeleriza Jerusalemi. Ndakahaane mageri ku vandu visuuvirizaa vene kandi avaluviriri, avevoora ndi, ‘Yahova siakolaa kindu choosi kilahi anoho kidamanu mba.

¹³ Vutugi vwavo vulavugulwa kandi zinyumba ziavo ziladivizwa. Sivalakamenye mu zinyumba zia vumbaka mba, anaho sivalakanwi iwaini kutura ku mizabibu jaavo ja vataga mba.’ ”

¹⁴ Lidiku lia Yahova liveeye ahimbi, himbi ligali kandi lizaa vwangu! Lidiku yilio lilakave lilulu kali avasikari valuviliri valakaliri nu mwoyo munene!

¹⁵ Lilakave lidiku liu vutima vululu, lidiku lie kivi kandi lidiku liu vudinyu; lidiku liu kwononya kandi kudiviza, lidiku lie kisundi kenene ligali, lidiku limwamu kandi lia malesi manyingi.

¹⁶ Lidiku lizuiyi liyoga lie visiriva viu vulwani kandi lwanga lwa vasikari vu vulwani avingiliyi madaala gi zimbinga kandi gi minaara mitambi.

¹⁷ Yahova avoora, “Ndakaleete kivi ku vandu vosi, maku valakahunahuni kuli avavoku, kigira vamali kongolera vwoni. Kalunu masahi gaavo galakasundulwi kuli amazi kandi miviri jaavo mikuzu jilakagundiri ku marova.”

¹⁸ Ku lidiku yilio lwa Yahova alakamanye vutima vwivwe vululu, kali zifeza ni zizahabu ziavo ziosi sizilakavahonye mba. Muliru gwu vutima vwivwe gu lakadivizi kivala choosi. Nonoho alakaleete keheri ku vuli mundu woosi omenyi ku lirova.