Zaburi 99 - KITABU KITAKATIFU

Nyasaye aveeye mwami munene

¹ Yahova aveeye mwami; leka avandu vadegere. Yikalaa kondeve yeeye yu vwami igulu wi vilombe vie zimbaha, na lirova lidengeyaa!

² Yahova Nyasaye aveeye munene ligali mu Ziyoni, akuminywa igulu ku zihiiri ziosi.

³ Sa mulala alizominya lieta lilie linene kandi liezingulu. Aveeye mutakatifu!

⁴ Ivi oveeye mwami wizingulu ligali uyanzaa agaveeye malungi; umali kusingiriza likalaga lirungi mu kivala cha Isiraeli; umali koleta vulungi kandi likalaga lia giligali vugira liyaanzilira.

⁵ Mwizominye Yahova, Nyasaye wiitu. Musigamiri imbiri wendeve yeeye yu vwami! Aveeye mutakatifu!

⁶ Musa na Haruni vaali vasaalisi veve; kandi Samweli yaali mulala ku avasaalaa kuye. Vanira ku Yahova naye yavativulira.

⁷ Yamoloma kuvo kutura mu munara gwi lilesi; vahulira lienya lilie na malago ga yavaha.

⁸ O, Yahova Nyasaye wiitu, ivi wativulira avandu vovo; wavamanyia ndi oveeye Nyasaye usamiihaa; kali wavaha mageri kigira uvwoni vwavo.

⁹ Mwizominyi Yahova, Nyasaye wiitu; mumusigamiri ha kiguru chiche kitakatifu! Yahova Nyasaye wiitu aveeye mutakatifu.