Zaburi 95 - KITABU KITAKATIFU

Lwimbu lwukwizominya Nyasaye

¹ O, Hambi, gendi kwizominye Yahova! Gendi kwimbi nu vusangali ku Nyasaye ukukinga nokokohonyia.

² Kandi kuzie imbiri weve nilisandiza; Gendi kumwimbiri zinyimbu ziesango yilizominya.

³ Yahova aveeye Nyasaye munene ligali; aveeye mwami munene ligali igulu ku vanyasaye vosi.

⁴ Yamiha ku lirova liosi, kutura mu zimbangaywa ziu musi ligali kuduuka ku vigulu vitambi ligali.

⁵ Yamiha ku zinyanza zia yalomba; yamiha ku livoora kandi lia oyo mwene yaalonga.

⁶ Hambi, gendi kumwinamiri kandi kumusigamiri; gendi kusigame imbiri wa Yahova mulombi wiitu.

⁷ Yahova aveeye Nyasaye wiitu! Na kunyi koveeye avandu va adendaa, kuli mwayi alihizaa magondi geege; huliri kalunu ku cha avoora:

⁸ “Mutadinyia magoti ginyu mba, kuli avaguuga vinyu vaakora ha Meriba, kuli vaali ku lidiku yilio muchangalangwe na Maasa.

⁹ Wene yeyo, vamimbiika mu magerizu kandi ni vangeriza, kali niiva vaali nivaloli aga ndavakolera.

¹⁰ Avandu yavo vaambihiliriza ku mihiga arubaini. Ndavoora, ‘Vaveeye avandu vataveeye avasuuvirifu! Vasuura kuhulira malago gange.’

¹¹ Kunangwa ndisuuha mu vutima vwange nimbora, ‘Sivalingira mu kivala cha ndakavaheye vweremerizi mba.’ ”