Zaburi 94 - KITABU KITAKATIFU

Nyasaye aveeye mukalagi wa avandu vosi

¹ O, Yahova, ivi oveeye Nyasaye uvanzaa kisaalia ku vasigu vovo; uvuli uvutima vuvwo kuvo.

² Ivi oveeye mukalagi wa vandu vosi; singira na uhaane ku vandu avuluyayi kidukanaa navo!

³ O, Yahova, vachamu valasangala kuduuka ng'inga ki? Valasangalira uvudamanu vwa vakora kuduuka ng'inga ki?

⁴ Avavunagi va malago valekonya nukwenenehiza kuduuka ng'inga ki? Valigingira kigira uvudamanu vwa vakolera avandu kuduuka ng'inga ki?

⁵ O, Yahova, vasionolanyia avandu vovo, kandi vadambiza yavo avaveeye avoovo.

⁶ Vita avakunzakali navavisandu, kandi vita avageni vamenya mu kivala chietu.

⁷ Vavoola: “Yahova sialola cha kunyi kokoraa mba; Nyasaye wa vandu va Isiraeli siamanyi kindu mba.”

⁸ O, munyi avandu vange, munyala ndi kuva vasiru kuli ndio? Munyi avasiru, muliiga ng'inga ki?

⁹ Nyasaye yalomba amatu giitu, alavula kuhulira? Yalomba zimoni zietu, alavula kolola?

¹⁰ Agondokeraa zihiiri, alavula kuhaana mageri kuzio? Yahova aveeye mwigizi wa vandu vosi, alavula kuva novogeri?

¹¹ Yahova amanya cha vaganagana; amanya kuli zing'anagani ziavo ziveeye zia vuzwa.

¹² O, Yahova, aveeye nuvugasu mundu uyu uwa ohezaa mageri. Kandi uyu wa ivi wigiza lilaga liilio.

¹³ Ivi umuhezaa vosoosi kutura mu madiku gu vudinyu, Kuduuka lwovogo vuyavwa kotega avachamu.

¹⁴ Yahova sialaleka avandu veve mba; sialang'ara yavo avaveeye aveeve mba.

¹⁵ Likalaga lirungi lilanyooleka mu zikooti, na avandu vosi valungi valavolonda nukuliunga mukono.

¹⁶ Nivwaha wasingira mu vogono vwange ukuhingira avachamu? Nivwaha wangonya kuhingira avakoli vuvudamanu?

¹⁷ Yahova alavula kongonya, ngano ndaazia vwangu mu kivala cha vakuzu.

¹⁸ Lwa ndavoora, “Ngwizaa”; navuzwa uvuyanzi vuvwo uvutali nekeheri, O, Yahova vwambonyia.

¹⁹ Lwa mbezaa mu linyang'ana nilihenda mwoyo, oneminyaa mwoyo kandi usangalizaa.

²⁰ Ivi siuhambanaa na vakalagi vadamanu mba, avakolaa likalaga lirungi kuva lichamu.

²¹ Avazilohizaa mu vwivisu kokolera avandu valahi uvudamanu. Kandi avakalagiraa avandu vataveeye niimbala likuza.

²² Navuzwa Yahova akingaa inzi; Nyasaye wange yasoolaa,

²³ Yahova alavaha mageri kigira uvudamanu vwavo, kandi alavadiviza kigira uvwoni vwavo; Yahova Nyasaye wiitu alavadiviza ligali.