Zaburi 92 - KITABU KITAKATIFU

Lwimbu lwu kwizominya Nyasaye ku lidiku lie Lisabato

¹ O, Yahova, voveeye vulahi ligali kuhaana lisandiza ku ivi, ukwimbira ivi zinyimbu zie lizominywa O, Nyasaye Oveeye Igulu Ligali

² kulandiza uvuyanzi vuvwo vutaveeye nekeheri vuli mugambazuri, kandi ukulandiza vusuuvirifu vuvwo vuli vudiku,

³ nizinyimbu ziukwimbira ku viju vie lidienyi, kandi zinyimbu zindahi ziuvusangali ku vukana.

⁴ O, Yahova, vikolwa vivio vinene visangalizaa. Nyimbaa nuvusangali vonene kigira vindu via umali kokora.

⁵ O, Yahova, vikolwa vivio viveeye vinene ligali! Zing'anagani zizio ziveeye ziu musi ligali!

⁶ Yiki ni kindu chu musiru atanyala kumanya; umuyingu sianyala kumanyiriza mba.

⁷ Umuchamu anyala kuviruka kuli indiva, yavo avakolaa uvudamanu vanyara komedeka ku miandu; navuzwa valadivizwa ligali mihiga ni mihiga.

⁸ O, Yahova, navuzwa ivi oveeye munene kuvita vosi mihiga ni mihiga.

⁹ Kunyi kumanya ndi avasigu vovo valakuza, na avachamu vosi valaguutwa.

¹⁰ Ivi umali kokora inzi kuva nizinguru ligali kuli embogo; umali kuungasiza nuvusangali.

¹¹ Mali kolola liguutwa lia vasigu vange kandi mali kuhulira lilira lia avachamu.

¹² Avalungi valamedeka ni miandu kuli misaala ja makindu; valaviruka kuli misaala ji midaragwa ja Lebanoni.

¹³ Vaveeye kuli misaala jasimikwa munyumba ya Yahova, jiviruka mu Litembeli lia Nyasaye wiitu.

¹⁴ Avaamaa makuyu mu vusakulu vwavo, kandi vaveeye kuli amatu mavisi kandi agizingulu.

¹⁵ Yaga gamanyia ndi Yahova aveeye ni Likalaga lirungi ku avandu, kandi siaveeye ho nuvudamanu mu mukingi wange mba.