Zaburi 91 - KITABU KITAKATIFU

Nyasaye aveeye mukingi wiitu

¹ Uyu omenya isi wi likingwa lia Nyasaye oveeye Igulu Ligali, uyu omenyaa isi wi chiriri cha Yahova Wuvunyali,

² alavolera Yahova, “Ivi oveeye chukwirukira mu change kandi imbinga yange. Ivi oveeye Nyasaye wange; suuviraa mu ivi.”

³ Ligali Nyasaye alakohonyia kutura mu vuhimwa vwu mu vwivisu kandi alakukinga ku vulwaye vwitaa vwosi.

⁴ Alakukunika ni zimbaha zizie; ulanyora mirembe mu vulindi vwivwe, uvusuuvirifu vwivwe vulakukinga kandi vulakosoola.

⁵ Utatia uvuhimwa vwukutihiza mu ing'inga yuvudiku, anoho lingilirwa lia nonoho mu ing'inga ya mbasu;

⁶ utatia uvulwaye vwitaa mu kisundi, anoho uvudamanu vwitaa mbasu hagati mba.

⁷ Avandu elefu ndala vanyara kugwa ma vakuzi ahimbi ku avandu zielefu likomi valagwa ma vakuzi hamukono gugwo mulungi, navuzwa ivi siulasalirizwa kali hakuzu mba.

⁸ Ivi ulahenza vuzwa nokolola, kuli avachamu vahevwa mageri.

⁹ Ivi umali kokora Yahova kuva uvuhaliru vuvwo, okoli Nyasaye oveeye igulu ligali kuva likingwa liilio;

¹⁰ nandio kivi choosi sikilakugwira kali hakuzu mba. Uvudinyu vwosi sivulisunda himbi na hango hoho mba.

¹¹ Nyasaye alalaga zingelosi veve vakulindi, kandi vakukingi hoosi ha uzia.

¹² Valakuginga igulu mu makono gaavo gase ulikigitala umwene ku magina na usaliri.

¹³ Uladuvaga zisimba nizinzoka, uladuvulanyia avana vi zisimba kandi vihirigoma viuvusungu vululu.

¹⁴ Nyasaye avoora, “Ndahonyia yavo avayaanzaa, kandi ndakinga yavo avambugiliraa kuli Yahova.

¹⁵ Lwa vanira ku inzi, ndavativulira; ndava harara navo lwa vaveeye mu vudinyu. Ndavasoola nukuvaha luyali.

¹⁶ Ndavaha madanyi gi livamwoyo lia madiku manyingi kandi ndavahonyia.”