Zaburi 90 - KITABU KITAKATIFU

KITABU CHA KANE Zab. 90—106 Lisaala lia Musa Umundu wa Nyasaye

¹ O, Yahova, ivi oveeye vomenyo vwitu mu makura goosi.

² Imbiri wu waali nukikiri kolomba vigulu, anoho nukiri kolomba lirova na viosi viveeye mu, waali Nyasaye uhindiraa mihiga ni mihiga, kandi ulava Nyasaye mihiga ni mihiga.

³ Ivi ulaga mundu yirane ku luguchi, umugirung'anyiaa ukwirana ku luguchi ukwa yatura.

⁴ Ku ivi mihiga elefu jiveeye kuli lidiku lilala; jiveeye vuzwa kuli mugolova ugumali kuvita, jiveeye vuzwa kuli ing'inga ngekeeke mu vudiku.

⁵ Ivi ukuhilaa ihale ligali kuzinguru kuli mugera gwizuuyi du; sikuhindiraa hatambi kuvita lilota mba. Kunyi koveeye vuzwa kuli indiva emeraa mugamba,

⁶ Indiva yiyi isivukaa mugamba nukulaviza kimuli, makuniala nukukuza ha mugolova.

⁷ Kunyi kudivizwa nu vutima vuvwo. Kutihizwa ligali nu vutima vuvwo vululu.

⁸ Ivi uviikaa uvwoni vwitu imbiri woovo. Uvikaa uvwoni vwitu vwumuvwivisu aha unyala kuvolola.

⁹ Livamwoyo lietu limbihizwa mu vutima vuvwo; liheraa vuzwa kuli mwika.

¹⁰ Mihiga ji livamwoyo lietu ni sabwini, nikuva nuvulamu vulahi, ni mihiga samanini. Navuzwa ijo josi jikoleteraa ikivi novovereri; livamwoyo liheraa nonoho, ma kutura ho vwangu.

¹¹ Nivwaha umanya zinguru ziu vutima vuvwo vululu; Nivwaha umanya ni vutihizi ki vwu vutima vuvwo vunyala koleta?

¹² Ukwigize kumanyirize kuli livamwoyo lietu liveeye limbi. Kunangwa kuduuki kuva novogeri mu mioyo jietu.

¹³ Uvutima vuvwo vulahindira kuduuka ng'inga ki? O, Yahova, overerere avatumikiri vovo.

¹⁴ Okohe uvuyanzi vuvwo vutali nekeheri vuli mugamba zuri. Kunangwa kuduuki kwimba nukusangara mu livamwoyo lietu liosi.

¹⁵ Okohe kalunu mihiga minyingi ju uvusangari vunyingi, kuli wakuha mihiga minyingi jo vovereri ni kivi.

¹⁶ Leka kunyi avatumikiri vovo kolole vikolwa vivio vinene. Leka visukululwi viitu valore zinguru zizio ziu vukumi.

¹⁷ O, Yahova Nyasaye wiitu, leka uvugasu vuvwo vove ku kunyi. Okohe liguuta ni ligasizwa mu vindu viosi via kokora!