Zaburi 89 - KITABU KITAKATIFU

Lwimbu mu ing'inga yu vudinyu

¹ O, Yahova, ndimba kigira vuyanzi vuvwo vutaveeye ne keheri; ndalandiza vusuuvirifu vuvwo ku makura goosi mihiga ni mihiga.

² Inzi manya ndi vuyanzi vuvwo vulava ho mihiga ni mihiga, kandi vusuuvirifu vuvwo vulasingira vudinyu kuli iligulu.

³ Ivi wavoola, “Mali kolomba lilagana liange nu mutumikiri wa Inzi mwene ndaatovora; kandi mali kusuuviriza mutumikiri wange Daudi nokovoora,

⁴ ‘Inzi ndakora visukululwi vivio kuva avami mihiga ni mihiga, kandi uvwami vuvwo vulava ho ku makura goosi mihiga ni mihiga.’ ”

⁵ O, Yahova, viosi iviveeye mu ligulu viembaa lizominya lie vindu viokogenyia via okolaa, kandi zingelosi vovo vimba nu kwizominya uvusuuvirifu vuvwo, O, Yahova.

⁶ O, Yahova, siaveeye ho nu mundu kali mulala mwigulu oveeye kuli ivi mba, anoho vilombe viosi viveeye mu ligulu sivinyala kweleng'anyia ku ivi mba.

⁷ Ivi oveeye Nyasaye utiivwa mu livugana lia vatakatifu, vosi vasingilaa mu liegehiza imbiri woovo.

⁸ O, Yahova, Nyasaye Wuvunyali, siaveeye ho numulala oveeye wizingulu kuli ivi mba, O, Yahova, ivi oveeye musuuvirifu mu vindu viosi.

⁹ Ivi wamihaa kunyanza yi zinguru ligali, ukiring'anyia viguvuli viayo viuvutima vonene.

¹⁰ Wasionolanyia ugunyama gonene, Rahabu nu kugwita, waguuta avasigu vovo kuzinguru zizio zinene.

¹¹ Ligulu ni lirova viveeye vivio, walomba lirova kandi vindu viosi iviveeye mu lio.

¹² Ivi walomba lirova kutura Ivaale kuduuka Isavaalu; Avandu vu kukiguru cha Tabori kandi kiguru cha Herimoni viimba ni vizominya ivi kigira uvusangari.

¹³ Ivi oveeye wi zinguru, ligali! Zinguru zizio ziveeye zinene ligali!

¹⁴ Uvulungi kandi agiligali viveeye umuse gwu vwami vuvwo; uvuyanzi vutaveeye ni keheri kandi uvusuuvirifu vilolekaa mu viosi via okolaa.

¹⁵ O, Yahova, vaveeye nuvugasu yavo avasigamiraa ivi ku liemba zinyimbu ziu kukwizominya, kandi avamenyaa mu vulavu vwu vulahi vuvwo;

¹⁶ vasangala lidiku liosi kigira ivi; kandi vizominyaa ivi kigira uvulahi vuvwo.

¹⁷ Ivi okohezaa liguuta linene; kandi mu vuyanzi vuvwo, okoheeza uvuguuti.

¹⁸ O, Yahova, ivi oveeye mukingi wiitu, ivi Nyasaye Mutakatifu wa Isiraeli, wakuha mwami wiitu.

Lisuuviriza lia Nyasaye ku Daudi

¹⁹ Ivi wavoolera mu malola mutumikiri woovo musuuvirifu, mu madiku ga kale, “Inzi mali kuhaana ovokonyi ku musikari muguuti; mali kuhaana uvwami ku mulala wa inzi mali kotovola kutura mu avandu.

²⁰ Inzi mali kokora mutumikiri wange Daudi kuva mwami, mali kumuvaka amaguta matakatifu.

²¹ Zinguru ziange zilava naye kazozo, kandi ndamukora kuva ni zinguru ligali.

²² Avasigu veve sivalamuguuta mu vulwani mba; kandi avandu vachamu si valamuguuta mba.

²³ Ndaduvulanyia avasigu veve imbiri weve, kandi ndiita samulala umudunyiraa.

²⁴ Ndamuyaanza kandi ndava musuuvirifu kuye, mihiga ni mihiga ndamukora kuva muguuti kazozo.

²⁵ Ndanenehiza uvwami vwivwe kutura kunyanza ya Meditareniani kuduuka ku mugera gwa Efurate.

²⁶ Naye alanira ku inzi nokovoora, ‘Ivi oveeye baba wange kandi Nyasaye wange; Ivi oveeye mukingi wange kandi muhonyi wange.’

²⁷ Ndamukora ave muyaayi wange wimbiri, kandi mwami munene ligali kuvita avami vosi.

²⁸ Ndizuliza lisuuvirizwa liange naye kazozo, kandi lilagana liange naye lilamenya mihiga ni mihiga.

²⁹ Uvwami vwivwe vulahindira lwi ligulu likiki riho, kandi visukululwi vivie vilava avami kazozo.

³⁰ “Navuzwa niiva visukululwi vivie vilavula kuhulira lilaga liange, kandi niviivura komenya kolondekana na amalago gange,

³¹ niiva valononyia amigizu gange, kandi vavuli kugumira amalago gange,

³² hene yaho, ndavaha amageri kigira uvwoni vwavo, ndavakora vasaaliri kigira uvudamanu vwavo.

³³ Navuzwa inzi sindaleka kuvula kuyaanza Daudi anoho kuvula kuduukiza lisuuviriza liange kuye mba.

³⁴ Inzi sindavunaga lilagana liange naye mba, anoho ndulize ho lisuuviriza kali lilala lia ndaalomba naye mba.

³⁵ “Inzi mali kwisuha ku lieta liange litakatifu ndi ‘Si ndavehera ku Daudi mba.’

³⁶ Alava ni visukululwi kazozo, kandi ndaleka uvwami vwivwe vuhindiri mihiga ni mihiga kuli iliuva liaka.

³⁷ Uvwami vwa Daudi vulasingilizwa kuli umweli vuladinyirizwa ku ing'inga yi ligulu lihindira.”

Lisioma kigira liguutwa liu mwami

³⁸ O, Nyasaye, kalunu oveeye nu vutima nu mwami mutovole woovo, umali kumusuura nukumuleka.

³⁹ Umali kuvunaga lilagana liilio lia walomba nu mutumikiri woovo, kandi umali kusiuva itaji yeeye mu luguchi.

⁴⁰ Umali kusambula amadigi gi lidaala lilie linene, kandi umali kokora zimbinga zizie kuva hazwa.

⁴¹ Avandu vosi avavitaa kunzira viva miandu jije; avatende veve vosi vamusekerizaa.

⁴² Umali kuhaana liguuta ku avasigu veve, kandi umali kuvakola vosi kuva nu vusangali.

⁴³ Umali kuduhiza viugi vivie viu vulwani, kandi umali koleka aguutwi mu vulwani.

⁴⁴ Umali kutuliza ho zinguru ziu vwami vwivwe, Kandi umali kozooma hasi endeve yeye yu vwami.

⁴⁵ Umali kwimbihiza madiku gi livamwoyo lilie, kandi umali kumuviika mu zisoni.

Lisaala liovohonyi

⁴⁶ O, Yahova, ulivisa umwene kuduuka ing'inga ki? Uvutima vuvwo vulaaka kuli muliru kuduuka ing'inga ki?

⁴⁷ O, Yahova, wizulizi kuli madiku gi livamwoyo liange gaveeye amimbi, kandi wizulizi ndi ivi walomba kunyi kwosi kuva avandu vakuza.

⁴⁸ Nivwaha unyala komenya vugira likuza? Mundu anyala ndi kweleha ku kilindwa?

⁴⁹ O, Yahova, lilolekiza liu vuyanzi vutaveeye ne keheri vuvwo vwa maziambiri voveeye haliha? Lisuuvirizwa lia walomba na Daudi mutumikiri woovo liveeye haliha?

⁵⁰ O, Yahova, utivilira kuli inzi mutumikiri woovo nyegwa, kandi kuli nzikuzira ku vilaamo viosi via vandu vatakumanyi.

⁵¹ O, Yahova, avasigu vovo vanyega mwami woovo mutovole! Vamunyega nu kumusekeriza havundu hoosi aha azizaa.

⁵² Yahova Nyasaye yizominywi mihiga ni mihiga! Amini! Amini!