Zaburi 88 - KITABU KITAKATIFU

Lianira Ovokonyi

¹ O, Yahova Nyasaye, muhonyi wange, ndilaa ku ivi mbasu gwosi, kandi nzanira ku ivi uvudiku vwosi.

² Hulira lisaala liange; huliriza ku lianira liange kigira ovokonyi!

³ Mbeeye mu vudinyu vunyingi ligali, kali mbeeye ahimbi kukuza.

⁴ Mbeeye kuli avandi vosi avaveeye ahimbi kukuza; zinguru ziange ziosi zifweye.

⁵ Inzi mali kolekwa hagati ha vakuzu; Mbeeye kuli yavo viitwa avagonaa mu vilindwa, yavo ava umali kwivilira ligali, avaveeye ihale kutura ku vokonyi vuvwo.

⁶ Umali kusiuva musi ligali mwi kilindwa, mu kisundi kenene kandi mu vogo vwa hasi ligali.

⁷ Uvutima vuvwo vuminaa ligali, kandi mali kusionolanywa niviguvuli.

⁸ Okoli avalina vange vandeke; umali kongola chukuvihiliriza kuvo; mbaniywi mu ligali kandi sinyala kwiruka mba.

⁹ Zimoni ziange zimali kozengera kigira ovovereri. O, Yahova, nzanira ku ivi vuli lidiku; ng'ingaa makono gange ku ivi mu lisaala.

¹⁰ Ivi okolera avakuzu viokogenyia? Valasimuguka nukukwizominya?

¹¹ Uvuyanzi vuvwo vutaveeye ne keheri vovolangwa ku mu kilindwa? Anoho, uvusuuvirifu vuvwo vovolwa ku havundu hilidiviza?

¹² Viokogenyia vivio vilamanyikana mu kisundi? Anoho uvulahi vuvwo vulamanyikana ku mu kivala cha avakuzu?

¹³ O, Yahova nzanira ku ivi kigira ovokonyi; saalaa ku ivi vuli mugambazuri.

¹⁴ O, Yahova, kigira ki usulaa? Kigira ki ugirung'anaa kutura ku inzi?

¹⁵ Inzi ndaakubizwa kivi kutura vwana vwange kali nimba ahimbi kukuza. Nduhi ligali kuturana nuvuliduhu vwa mageri googo.

¹⁶ Uvutima vuvwo vululu vuusionolanyia; lingilira liilio lidamanu lindivizi ligali.

¹⁷ Vangumbiriza kuli mugera gwizuuyi umbasu gwosi; vanzingilira kutura ku zimbega ziosi.

¹⁸ Okoli kali valina vange vahimbi ligali vaandeke, ligali kisundi nicho ekeveeye muyanze wange weng'ine.