Zaburi 86 - KITABU KITAKATIFU

Lisaala lio vokonyi

¹ O, Yahova, huliriza lisaala liange na undivuliri, kigira mbeeye utinyaliza kandi umudedekere.

² Ombonyie kutura ku likuza kigira mbeeye musuuvirifu ku ivi. Ombonyie kigira mbeeye mutumikiri woovo na suuviraa mu ivi.

³ O, Yahova ivi oveeye Nyasaye wange ombere zimbavasi, inzi nzanira ivi lidiku liosi.

⁴ O, Yahova, kola mutumikiri woovo kuva nu vusangali, kigira lisaala liange ku ivi.

⁵ Ivi oveeye mulahi ku kunyi, kandi usamihaa uvwoni vwitu, wayizula uvuyanzi vutaveeye ne keheri ku yavo vosi avasaalaa ku ivi.

⁶ O, Yahova, huliriza lisaala liange, hulira lilira liange liu kwenya ovokonyi.

⁷ Nzanira ivi mu ing'inga yu vudinyu; kigira undivuliraa lisaala liange.

⁸ O, Yahova, siaveeye ho numunyasaye wundi munene kuli ivi mba, siaveeye ho kali mulala uwakola aga ivi wakola mba.

⁹ O, Yahova, zihiiri ziosi zia walomba, zilaza nu kukusigamira ivi; valizominya ovonene vuvwo.

¹⁰ Ivi weng'ine oveeye wizingulu kandi okolaa vindu viokogenyia, ivi oveeye Nyasaye.

¹¹ O, Yahova, unzigizi aga wenyaa ngole, na ndakuhulira nu vusuuvirifu vwosi, unzigizi kukutumikira nu mwoyo gwange gwosi.

¹² O, Yahova Nyasaye wange nzizominya ivi nu mwoyo gwange gwosi, kandi ndalandiza ovonene vuvwo mihiga ni mihiga.

¹³ Uvuyanzi vuvwo vutaveeye ne keheri voveeye ovonene ligali ku inzi! Umali kombonyia kutura mu likuza.

¹⁴ O, Nyasaye, avandu vigingiri vazaa nu kunwaana; muganda gwa vandu valulu vageriza kunzita, avandu vataveeye ni liegehiza imbiri woovo.

¹⁵ Navuzwa ivi, O, Yahova, oveeye Nyasaye wu vuyanzi kandi wi zimbavasi, oveeye mwikuziri, wuvuyanzi vutaveeye ne keheri kandi musuuvirifu kazozo.

¹⁶ O, Yahova, yaanza unziraniri kandi ombere zimbavasi; ombe zinguru kandi ombonyie, kigira ngutumikiraa vuzwa kuli mama wange yakola.

¹⁷ O, Yahova, umanyie ligali kelolero chu vulahi vuvwo, kunangwa yavo avandunyira vaduuki kuva mu zisoni, kigira umali kongonya nokoneminya mwoyo.