Zaburi 84 - KITABU KITAKATIFU

Liegomba kusigamira Nyasaye mu Litembeli

¹ O, Yahova Wuvunyali, Litembeli liilio liveeye liukuyanziza ligali.

² Ngayirangwa ligali kuva mulio! O, nzegomba ligali kuva mu Litembeli liilio! Nyimbiraa Nyasaye oveeye mwoyo zinyimbu nu mwoyo gwange gwosi kigira uvusangari.

³ O, Yahova Wuvunyali, mwami wange kandi Nyasaye wange, kali matondolizi gayumbaka zinyumba ziago, kandi zimile ziveeye ni zinyumba ziazio, ziviikaa viminyu viazio ahimbi nu vwali vuvwo.

⁴ Vaveeye nu vugasu yavo avamenyaa mu Litembeli liilio, nivimba kazozo zinyimbu ziu kwizominya ivi.

⁵ Vaveeye nu vugasu yavo avanyoora zinguru ziavo kutura ku ivi, kandi avegombaa kuzia kukusigamira mu kiguru cha Ziyoni.

⁶ Lwa vandu yava vavitira mu livona liumu lia Baka, livona yili ligwizaa kisinukiru cha mazi. Imbura yu kutanga ku muhiga ikubaa kuduuka amazi giizura mu lidavalia yili.

⁷ Avandu yava lwa vavitira mu livona lia Baka, zinguru ziavo zimedekaa vuli kazozo, kandi valalola Nyasaye wa avanyasaye.

⁸ O, Yahova Nyasaye, Wuvunyali hulira lisaala liange!

⁹ O, Nyasaye, gasiza mukingi wiitu; mwami wa umali kotovola.

¹⁰ Kuva mu Litembeli liilio ku lidiku lilala, voveeye vulahi ligali kuvita kuva havundu handi madiku elefu indala, vwakaveeye vulahi inzi kuva mulindi ha kirivwa chi Litembeli lia Nyasaye wange, ukuvita komenya mu zinyumba zia vandu vachamu.

¹¹ Yahova Nyasaye aveeye mukingi wiitu kandi mwami wu vukumi, akugaasizaa nuvulahi kandi nu luyali. Ahaanaa choosi ekeveeye kilahi ku yavo avakolaa uvulungi.

¹² O, Yahova Wuvunyali, vaveeye nu vugasu yavo avasuuviraa mu ivi!