Zaburi 83 - KITABU KITAKATIFU

Lisaala lie Liguuta Avasigu va Isiraeli

¹ O, Nyasaye, utachiring'ana mba; anoho utakiring'ana makiriri, kandi utava nilielemeriza mba.

² Henza! Avasigu vovo vakora liebaala, kandi yavo avakudunyiraa vamali kokokolera kivihiri.

³ Valohiza zing'anagani kwingilira avandu vovo, kandi vaganagana mu vwivisu kulwaana avandu vovo va ukingaa.

⁴ Vavoola, “Hambi kudivizi ihiiri ya vandu va Isiraeli, kunangwa vavuli kwizulizwa mihiga ni mihiga!”

⁵ Vavugirizana nu mwoyo mulala mu lilohiza liavo liu mu vwivisu, kandi valomba lihambana kulwaana ivi:

⁶ Avandu vi kivala cha Edomu, kandi ivisukulurwi via Ishimaeli, avandu vi kivala cha Moabu, kandi avandu vi ihiiri ya Hagari avamenyaa Ivugwi wa Gileadi, kolovega lwi ivugwi wu mugera gwa Jorodani,

⁷ avandu vi kivala cha Gebali ekeveeye Isavaalu wi inyanza yijumbi, avandu vi kivala cha Amoni ekeveeye Ivugwi wu mugera gwa Jorodani, Ivaale wi kivala cha Moabu na avandu vi ihiiri ya Amaleki avamenyaa isavaalu wi lidaala linene lia Yuda. Kandi avandu vi kivala cha Filisitia, ahimbi ni inyanza enene ya Meditareniani kandi na vandu vi lidaala lia Tiro.

⁸ Avandu vi kivala cha Asiria vamali kandi kuhambana navo; kuli ovokonyi vwizingulu vwa vandu vi kivala cha Amoni ni kivala cha Moabu, ivisukulurwi via Loti.

⁹ O, Nyasaye, haana amageri ku vandu yava vosi; kuli wakolera avandu vi kivala cha Midia, kandi ku Sisera munene wi liihi, na Jabini mwami wi kivala cha Hazori ha mugera gwa Kishoni.

¹⁰ Ivi wavadiviza ligali mu lidaala lia Endori ahimbi ni kiguru cha Tabori, kandi miviri jaavo jagundira ku marova.

¹¹ Haana amageri ku viimiliri vaavo kuli wakola ku Orebu na Zeebu; Guuta avamihi vaavo vosi kuli wakola ku Zeba na Zalimuna; avami vi kivala cha Midia.

¹² Avandu yava vosi vavoola, “Kunyi aveene kulivugulira kivala cha vandu va Isiraeli ekeveeye cha Nyasaye keve ichiitu.”

¹³ O, Nyasaye, uvasalanyie kuli uluguchi, kandi kuli mukuzi gwi imbuza ihilaa.

¹⁴ Kuli muliru gusambaa umulitu, kandi kuli olomemo lwu muliru lusambaa ivigulu,

¹⁵ uvakungi ligali ni imbuza yi kiihi, kandi uvatiihizi ligali ni imbuza yooyo yi kihuzuzi.

¹⁶ O, Yahova viika avandu yava mu zisoni zinene, kandi uvakole vamanye zinguru zizio.

¹⁷ Leka avandu yava vaguutwi kandi vatiihizwi mihiga ni mihiga, leka vakuzi mu zisoni zinene ligali.

¹⁸ Leka vaduuki kumanya ndi, ivi oveeye Yahova Nyasaye, Wuvunyali, uwamihaa ligulu ni lirova.