Zaburi 81 - KITABU KITAKATIFU

Lwimbu lwi lilia linene

¹ Mukubiri Nyasaye Isango oveeye mukingi wiitu. Mwimbiri Nyasaye wa Yakobo zinyimbu zie lizominywa.

² Mutange lwimbu mukubi visiriva; mwimbi zinyimbu ziukuyaanziza ku vukana ni lidungu.

³ Mukubi kisiriva kigira lilia, lwu mweli gulavaa kandi lwu mweli guchelaa.

⁴ Yili ni lilago mu kivala cha Isiraeli, lilaga kutura ku Nyasaye wa Yakobo.

⁵ Yaalihaana ku vandu va Isiraeli lwa yingilira kivala cha Egebeti. Mbulira mwoyo gutamanyikani nigovoora,

⁶ “Ndaatuliza misigo miliduhu ku migongo jinyu; ndaaleka muturi hasi misigo jinyu miliduhu ja madafari.

⁷ Lwa waali mu vudinyu, waanira ku inzi na ndakohonyia. Ndakutivulira lisaala liilio kutura havundu hange hukwivisa mu kihuzuzi nizinguba. Ndaakogeriza ha vidaho via Meriba.

⁸ O, avandu vange Isiraeli, hulirizi ku lieganihiza liange; vwakaveeye vulahi mulambuliriza!

⁹ Siulava nu munyasaye mugeni hagati hoho mba; kandi siulasigamira munyasaye mugeni mba.

¹⁰ Inzi mbeeye Yahova Nyasaye woovo uwakutuliza mu kivala cha Egebeti. Kunuura munwa gugwo, na inzi ndakulihiza.

¹¹ Navuzwa munyi avandu vange Isiraeli simwambuliriza mba; Mwasuura kumbulira.

¹² Kunangwa ndaavaleka vazie mu zinzira ziavo zie kilage, Nokolonda zing'anagani ziavo aveene.

¹³ Vwakaveeye vulahi avandu vange Isiraeli valambuliriza! Vwakaveeye vulahi niiva vakambuliyi!

¹⁴ Ngano ndakaguuti avasigu vaavo nonoho. Nukuguuta ligali avadambizi vaavo vosi.

¹⁵ Yavo avadunyiraa inzi Yahova vakasigami imbiri wange mu vuti; lihevwa amageri liavo liakahindiyi mihiga ni mihiga.

¹⁶ Navuzwa ndakamulihizi ni ingano indahi ligali kuvita nukumwigutiza nuvwuki vwu muvulimu.”