Zaburi 80 - KITABU KITAKATIFU

Lisaala liu kwilanyia ihiiri

¹ Ukuhuliri O, Yahova Mwayi wa vandu va Isiraeli, ukuhulirizi ivi uwaali wi visukululwi via Josefu kuli ichayo cha amagondi; Ivi wikala kondeve yu vwami igulu wa Vakerubi, ong'ereng'ane,

² wivuuli ivi umwene ku zihiiri zia Efuraimu, Benjamini na Manase. Ukumanyie zinguru zizio; kandi hamba okohonyie ku vasigu viitu!

³ O, Nyasaye, yaanza ukwilanyie okoveere zimbavasi kandi okohonyie ku avasigu viitu!

⁴ O, Yahova Nyasaye Wuvunyali, ulavihilirwa lisaala lia vandu vovo kuduuka ing'inga ki?

⁵ Ivi okoheeye liverera kulie kuli kulizaa mugadi, kandi okoheeye amaliga kunwi kuli kunweza amazi.

⁶ Ivi oleki zihiiri ziakukumbiriza kukulwaana nu kuvugura kivala chietu; avasigu viitu vakonyega nokokolera kehenyahenye.

⁷ O, Nyasaye, Wuvunyali, yaanza ukwiranyie, ma okoveere zimbavasi na kunyi kulahonywa ku vasigu viitu.

⁸ Ivi waleeta avandu vovo avaveeye kuli muzabibu kutura Egebeti; wakunga zihiiri zindi ziosi ziamenya mu kivala cha Kanaani. Kandi waleka avandu vovo ni vavugura kivala yiki.

⁹ Inyima lwa waali ni wakakua zihiiri zindi yizio kutura mu kivala cha Kanaani, avandu vovo vaavugura kivala ni vamenya mu. Kandi vameedeka ligali kuduuka niviizura kivala choosi.

¹⁰ Avandu yava vameedeka ni vizura mu kivala choosi kutura Ivugwi kuduuka Imadioli, kandi kutura Isavaalu kuduuka Ivaale midaragwa gwa kuunika kiguru cha Lebanoni.

¹¹ Avandu vameedeka ligali kali kuduuka ku zinzako zie kivala, kutura kunyanza ya Meditareniani kuduuka ku mugera gwa Efurate.

¹² Kigira ki ivi waleka avasigu ni vingilira kivala cha vandu va Isiraeli? Kalunu avageni vavitira mu kivala yiki vakiranyaa kandi vachononyia.

¹³ Vaduvaga kivala yiki kuli zinguruvi ziu muvulimu, kandi vononyia kivala yiki kuli zinyama ziu muvulimu.

¹⁴ O, Nyasaye Wanyala Viosi, yaanza ukwiranire kutura mwigulu, kandi hamba ohonyie avandu vovo.

¹⁵ Hamba kohonyie, avandu vovo avuwaviika mu kivala yiki, kandi uvakole kuva ihiiri yi zinguru ligali.

¹⁶ Avasigu viitu vamali kwononyia kizabibu, kandi vahambizi muliru kucho; nokoketemaga ligali haana amageri kuvo, kandi uvadivizi ligali.

¹⁷ Yaanza osoore avandu vovo avuwamala kotovola, ihiiri ya walomba kuva yizingulu ligali.

¹⁸ Maku kunyi sikulakoleka mihiga ni mihiga mba, yaanza okokole kove mwoyo, na kulizominya nukukusigamira mihiga ni mihiga.

¹⁹ O, Yahova Nyasaye Wuvunyali, yaanza ukwiranyie. Maku okoveere zimbavasi, na kunyi kulahonywa.