Zaburi 79 - KITABU KITAKATIFU

Lisaala lio kohonyia ihiiri

¹ O, Nyasaye, avandu vizihiiri vamali kwingira mu kivala chicho. Vamali kwononyia Litembeli liilio Litakatifu, kandi vakoli Jerusalemi kuva amang'anye.

² Vamali koleka miviri mikuzu ja vandu vovo kuva chukulia chi zisoti. Kandi vamali koleka zinyama ziu muvulimu zilie miviri ja vatumikiri vovo.

³ Vatahizi avandu vovo amasahi kuli amazi, amasahi giturukaa kuli amazi mu Jerusalemi mwosi, na sihaliho nu mundu kali mulala uwatigala kuyavira miviri mikuzu.

⁴ Zihiiri zia kumberiza kunyi zikonyegaa vuli kazozo, zi kosekeliza nu kokokolera kehenyahenye.

⁵ O, Yahova, ivi ulakusinyikira kuduuka mihiga ni mihiga? Uvutima vuvwo vulazizagilira kwaduka kuli muliru?

⁶ Girung'anyia uvutima vuvwo ku zihiiri zindamanu zitakusigamiraa, kandi ku vandu vatasaalaa ku ivi.

⁷ Zihiiri yizi zimali kwita avandu vovo Isiraeli, kandi vamali kudiviza kivala cha avandu vovo.

⁸ O, Yahova, utahaana ku kunyi amageri kigira uvwoni vwa vaguuga viitu mba. Yaanza okoveere zimbavasi. Kumali kogotiza lisuuvirizwa lietu liosi.

⁹ O, Nyasaye, yaanza okokonye kandi okohonyie. Okosoole kandi ukusamihi uvwoni vwitu kigira uluyali lwi lieta liilio.

¹⁰ Kigira ki avandu vi zihiiri vakoteeve ndi, “ Nyasaye winyu aveeye haliha?” Leka kolole ivi nuhaana amageri ku zihiiri yizi kigira vamali kwita avatumikiri vovo.

¹¹ Huliriza likenya lia vahambe avaaniraa ku ivi, na kuzinguru zizio zinene voholora yavo avakalagiywi likuza.

¹² O, Yahova, utungi zihiiri zindi haali saba, kigira amanyego goosi gavamali kokonyega.

¹³ Maku kunyi avandu vovo, amagondi gi chayo chicho, kulakusaandiza mihiga ni mihiga, kandi kulakwizominya zing'inga ziosi.