Zaburi 78 - KITABU KITAKATIFU

Nyasaye na avandu veve

¹ O, munyi avandu vange, muhuliri amigizu gange, muhulirizi ligali icha mboraa.

² Nziza kutumikira zing'ano zio vogeri ukwivaala agaviswa kutura ing'inga ya kale;

³ ivindu via kuhuliyi kandi via kumanyi ivindu via vaguuga viitu vakovolera.

⁴ Sikulavivisa ku avana viitu mba; kulavolera likula lizaa amakuva gi zinguru zia Yahova ni vikolwa vivie vinene, kandi ivindu viokogenyia via mali kokora.

⁵ Yahaana malago ku vandu va Isiraeli kandi Lilaga ku visukululwi via Yakobo. Yalaga avaguuga viitu vigizi avana vaavo amalago geege;

⁶ kunangwa likula lilonda ku liduuki kwiga amalago yago, kandi navo vaduuki kwigiza avana vaavo.

⁷ Munzira yiyi yavo kandi vaduuki kuviika lisuuvira liavo mu Nyasaye, kandi vavuli kwivilira vikolwa via yakola. Navuzwa vahuliri malago geege kazozo.

⁸ Sivalava kuli avaguuga vaavo mba, avandu vi liebaala kandi avatahuliraa; avi lisuuvira liavo mu Nyasaye siliali lidinyu kali hakuzu mba, kandi sivali avasuuvirifu kuye zing'inga ziosi.

⁹ Avandu va Efuraimu, vaali ni viugi viu vuta nimivano. Viiruka ku lidiku liu vulwani.

¹⁰ Sivagumira lilagana liavo na Nyasaye mba; vasuura kuhulira lilago lilie.

¹¹ Vivilira icha yaali naakori, vilolekizu vinene via vaali nivaloli Nyasaye naakoraa.

¹² Nyasaye yakola vilolekizu viokogenyia imbiri wa vaguuga vaavo mu kereremo cha Zoani mu kivala cha Egebeti.

¹³ Yavukanyia inyanza kandi naavavitizira hagati hayo; yalomba amazi gasingiri vulungi kuli madigi.

¹⁴ Yaavimilira ni lilesi ing'inga yu mbasu, ing'inga yuvudiku yaavimilira nuvulavu vwu muliru.

¹⁵ Yatanyia zinyanda mu changalangwe, navaha amazi manyingi kutura musi mwilirova.

¹⁶ Yakola otogera kusinuka kutura ku lwanda kandi naakora amazi nigituluruka kuli mugera.

¹⁷ Navuzwa vazizagilira kokora vudamanu imbiri wa Nyasaye, kandi mu changalangwe, vibaara ku uyu Oveeye Igulu Ligali.

¹⁸ Vasavira ligali kogeriza Nyasaye mu mioyo jaavo, ku liteeva vahevwe viukulia kuzinguru via vakayirwa kulia.

¹⁹ Vaamoloma ku Nyasaye vudamanu nivavoora, “Nyasaye aveeye unyala kukuha viukulia muchangalangwe?

²⁰ Gaveeye agiligali ndi yaduya ulwanda, na amazi gaasinuka nigituluka kuli mugera gwizuuyi. Navuzwa aveeye unyala kandi kuhaana ku kunyi uvuchima kandi ahaane ku vandu veve inyama?”

²¹ Lwa Yahova yahulira makuva gaavo yaga, yavihilirwa ligali. Yingilira avandu veve Isiraeli numuliru; uvutima vwivwe ku vo vwameedeka;

²² kigira sivali nilisuvira muye mba kandi sivasuuvira ndi alavahonyia ligali mba.

²³ Navuzwa Nyasaye yamoloma ku malesi igulu, kandi yalaga malesi giiguliki kuli miliango.

²⁴ Yavaha uvuswage kutura mwigulu, kandi natuma imaana kuli imbura vaduuki kulia.

²⁵ Kunangwa valia viukulia vie zingelosi, kandi Nyasaye yavaha viukulia viosi ivia venya.

²⁶ Nyasaye yakola kandi imbuza yu kudiviza yi Ivugwi kuhuuza, kandi kuzinguru zizie, yaavuluganyia imbuza yi Isavaalu kuhuuza nizinguru;

²⁷ yavatumira amanyonyi manyingi kuli muyeke gwi inyanza.

²⁸ Yahova yakola amanyonyi yago gagwi hagati hokososa haavo, kandi nakumbiriza amahema gaavo goosi.

²⁹ Kunangwa avandu valia inyama ni viiguta ligali Nyasaye yavaha icha venya.

³⁰ Navuzwa lwa vaali nivakikiri kwigutiza lienya liavo, kandi nivakilia inyama zana,

³¹ Nyasaye yavavihilira ligali, niyiita avasaza vaavo vizingulu ligali, na avayaayi valahi ligali va Isiraeli.

³² Kali ndio avandu vazizagilira kokora uvwoni, kali naakora vilolekizu hagati haavo, navuzwa sivasuuvira muye mba.

³³ Kunangwa yaaheriza madiku gaavo kuli mwika, kandi livamwoyo liavo liahera nonoho kuturana nikivi.

³⁴ Lwa Nyasaye yitaa valala kuvo, avandi vosi avatigara viirana kuye; niviganira nukwanira kuye nu mwoyo gwosi.

³⁵ Vizuliza ndi Nyasaye yaali mukingi wavo, ndi Nyasaye Wuvunyali yaazi kuvahonyia.

³⁶ Navuzwa amakuva gaavo gaali vuzwa ovovehi vwere; na choasi cha vavoola sichali cha agiligali mba.

³⁷ Sivali avasuuvirifu kuye mba; sivali avasuuvirifu ku lilagana liavo naye mba.

³⁸ Navuzwa Nyasaye yavererela avandu veve ligali. Yavasamiha uvwoni vwavo kandi siyavadiviza mba. Zing'inga zinyingi yigalira uvutima vwivwe vuvuli kutura, kandi siyaleka uvululu vwivwe vwosi vuduuki kuvo mba.

³⁹ Yizuliza ndi yava vaveeye vuzwa avandu avilikuza. Vaveeye vuzwa kuli mwika guhuzaa ma gogota vugira.

⁴⁰ Vibaara kuye ligali haali kanyingi mwigendanyama; vamuveereriza haali kanyingi mu changalangwe!

⁴¹ Vageriza Nyasaye kase na kase, Nivaleeta vuzunu vululu ku Nyasaye Mutakatifu wa Isiraeli.

⁴² Vivilira zinguru zizie zinene, kandi vivilira lidiku lia yavahonyia kutura ku vasigu vaavo,

⁴³ naakora vikolwa vivie vinene ligali nivilolekizu vinene mu kereremo cha Zoani mu kivala cha Egebeti.

⁴⁴ Yaagirung'anyia migera kugwa masahi, na vandu va Egebeti sivali namazi gu kunwa mba.

⁴⁵ Yatuma ziinji hagati haavo, iziavasaliriza vululu ligali, na amakere agononyia kivala chavo.

⁴⁶ Yatuma zisigi kulia vitagwa viavo nukwononyia milimi jaavo.

⁴⁷ Yononyia milimi ji mizabibu jaavo niimbura ya magina; yita misaala jaavo jamakuyu nuvukindu vonene.

⁴⁸ Yita zing'ombe ziavo niimbura ya magina, kandi yita viayo via magondi gaavo noloheni.

⁴⁹ Yaleka uvutima vwivwe vululu, livihiliriza, uvudinyu ni kivi viduuki kuvo, kuli muganda gwigwe gwi zingelosi gwukudiviza.

⁵⁰ Siyigalira uvutima vwivwe mba, anoho kohonyia livamwoyo liavo kutura mu likuza mba, navuzwa yaviita nuvulwaye vudamanu ligali.

⁵¹ Yita avayaayi vukutanga kwivulwa mu vuli inyumba ya vandu va Egebeti.

⁵² Maku, yimilira avandu veve nivatura kuli mwayi wa magondi, kandi naavimilira kuvitira mu changalangwe.

⁵³ Yaavimilira mu mirembe vulahi, na sivaatia mba; navuzwa inyanza yaza nikunika avasigu vaavo.

⁵⁴ Nyasaye yavaleeta mu kivala chiche kitakatifu, ku kiguru cha oyo mwene yaguuta.

⁵⁵ Yakunga zihiiri ziamenyaa mu imbiri wavo; yagavulira zihiiri zia Isiraeli kivala yicho keve miandu javo, kandi na haanaa zinyumba ziavo ku vandu veve Isiraeli vamenye mu.

⁵⁶ Navuzwa avandu va Isiraeli vibaara ku Nyasaye Wuvunyali, kandi nivamugeriza. Sivahulira malago geege mba.

⁵⁷ Navuzwa vaali avibaali kandi avataveeye vasuuvirifu kuli vaguuga vaavo. Vaali avatasuuvirwa kuli muvano gwu vuta vwavedeka.

⁵⁸ Vaavihiliriza Nyasaye nuvwaali vwavo vwu kusigamira misambwa, kandi vamukendekiza nivifananyi viavazwa viavo.

⁵⁹ Nyasaye yasinyika lwa yalora vindu yivi ligali; Kunangwa yasura avandu veve Isiraeli.

⁶⁰ Yaleka lihema lilie ha Shilo, hango ha yaali namenyi hagati hiitu.

⁶¹ Yavugilira avasigu viitu vagumiri Lisandugu lie Lilagana; kelolero chi zinguru kandi chu vukumi vwivwe.

⁶² Yavihilira avandu veve, kandi navaleka viitwi navasigu vaavo.

⁶³ Kigira avasoleri viitirwa mu vulwani, na vakaana sivali na vasaza vavaleeta mba.

⁶⁴ Avasaalisi vaavo viitwa nikivavi, na avakunzakali vaavo sivali vanyara kusioma mba.

⁶⁵ Mu limalirika Yahova yavuka kuli utulaa mu zindoolo. Yaali kuli mundu wizingulu uhanzuka kigira iwaini ya yaali nanweye.

⁶⁶ Yakunga avasigu veve naviiranyia inyima. Yavavika mu zisoni zie liguutwa lie mihiga ni mihiga.

⁶⁷ Navuzwa yasura visukululwi via Josefu; siyaatovola ihiiri ya Efuraimu mba.

⁶⁸ Mu vogono yivwo, yatovola ihiiri ya Yuda, kandi natovora kiguru cha Ziyoni, havundu ha yaayanza ligali.

⁶⁹ Yumbaka ahene yaho Litembeli lilie kuli hango hehe mwigulu. Yalilomba lidinye kuli lirova liayasingiriza kuhindira mihiga ni mihiga.

⁷⁰ Yahova Nyasaye yatovola mutumikiri weve Daudi; naamutuliza ku miyinzi ju vwayi vwa magondi,

⁷¹ kutura ku miyinzi jukwaya magondi; kandi yamukola ave mwami wa Isiraeli umwayi wa vandu va Nyasaye.

⁷² Daudi yavalinda nu vusuuvirifu vwu mwoyo gwigwe gwosi. Kandi yaavimilira vulahi novogeri vonene ligali.