Zaburi 77 - KITABU KITAKATIFU

Koleminywa mwoyo mu ing'inga yu vudinyu

¹ Nzanira ku Nyasaye nu mwoyo gwange gwosi; Nzanira kuye vudinyu ligali, mbula yambulira.

² Inzi saalaa ku Yahova mu ing'inga yu vudinyu vwange; ng'ingaa amakono gange igulu ku Nyasaye uvudiku vwosi vugira kuluha, navuzwa sinyoolaa lileminywa mwoyo nu mundu wundi woosi mba.

³ Lwa ng'anagana kigira Nyasaye, mbendaa mwoyo ligali; lwa ng'anagana vudinyu ligali mwoyo gwange gukuzaa ligali.

⁴ Nyasaye yanombaa kuganagana uvudiku vwosi, kandi mbeeye ni lihenda mwoyo ligali kandi kali si nyara komoloma mba.

⁵ Ng'anagana ku amadiku gaavita, kandi nzizuliza mihiga ja kale.

⁶ Vudiku vwosi mwoyo gwange goveeye mu liganagana linene, mu liganagana liange, na yaga nigo ganzeteevaa:

⁷ “Yahova alasura kunyi mihiga ni mihiga? Kandi alavula kuyanzizwa ni kunyi mihiga ni mihiga?

⁸ Uvuyanzi vwivwe vutaveeye nekeheri kukunyi vumali kohera? Lisuuviriza lilie ku kunyi liheraa mihiga ni mihiga?

⁹ Nyasaye umali kwivilira kuva wi zimbavasi? Uvutima vwivwe vumali kuvugura ovogono vwi livererera lilie ku kunyi?”

¹⁰ Maku ndavoora, “Kindu kisalirizaa ligali kuvita viosi ni yiki: Nyasaye Wuvunyali siaveeye nizinguru kandi mba.”

¹¹ O, Yahova, inzi ndizuliza vikolwa vivio vinene; kandi ndizuliza vindu viu kogenyia viawakola mu madiku ga kale.

¹² Inzi ndaganagana ku vindu viosi via wakokola; kandi ndaganagana ku vikolwa vivio viokogenyia.

¹³ O, Nyasaye, vindu viosi via okolaa viveeye vitakatifu. Siaveeye ho numunyasaye oveeye munene kuli ivi mba.

¹⁴ Ivi oveeye Nyasaye okolaa vilolekizu viokogenyia; wamanyia havulavu zinguru zizio hagati hi zihiiri.

¹⁵ Wahonyia avandu vovo kuzinguru zizio, kandi wahonyia visukululwi via Yakobo na Josefu.

¹⁶ O, Nyasaye, lwa mazi gaakolola, gaali nuvuti ligali, kandi luliva lwinyanza lwaadegera.

¹⁷ Amalesi gasundula imbura inguba yatuluruka kutura mu ligulu, no loheni lwahemahema zimbega ziosi.

¹⁸ Mwoyo gugwo gwahulika kuli liatuluruka lie inguba, kandi lihemahema lioloheni liaka mu lirova liosi; lirova liatenga kandi ni lidegera.

¹⁹ Ivi wangenda kuvitira mu viguvuli via mazi; kandi wambuka luliva lwinyanza, navuzwa zinduvatiru zizio siziali zinyala kololekaa mba.

²⁰ Ivi wimilira avandu vovo kuli mwayi wi chayo cha magondi, kandi watovola Musa na Haruni kuva vimiliri vaavo.