Zaburi 75 - KITABU KITAKATIFU

Nyasaye Mukalagi

¹ O, Nyasaye, kuhaana lisandiza ku ivi; kuhaana lisandiza ku ivi ligali. Kulandizaa kuli ivi oveeye munene ligali kandi kovoolera avandu vindu viokogenyia via ivi wakola.

² Nyasaye avoora, “Inzi mali kuviika ho ing'inga yi likalagirwa,” kandi “Ndakalaga likalaga liu vulungi.

³ Kali niiva vilombe viosi mu lirova lidengeyizwa, inzi mwene niyie usingirizaa misingi jalio vudinyu.

⁴ Inzi mbolera avigingiri, mutigingiri mba. Kandi mbolera avachamu, muteloli mba.

⁵ Mutiganagana kuva avandu vu vunyali ligali, anoho komoloma makuva ni liegingira mba.”

⁶ Likalaga lia Nyasaye silitulaa ivugwi anoho imadioli, kandi silitulaa Ivaale anoho Isavaalu mba.

⁷ Navuzwa Nyasaye mwene niyie oveeye mukalagi; Agehizaa zinguru zia valala, kandi anenehiza zinguru zia avandi.

⁸ Yahova ugumiyi kekombe mu mukono gwigwe, nichizuyie iwaini induru yu vutima vwivwe. Agisundulaa ichova na avandu vachamu vosi vu mulirova, vaginwezaa; yee, vaginwezaa ku engelageriza yu kumalirika.

⁹ Navuzwa inzi sindaleka komoloma amakuva ga Nyasaye wa Yakobo. Anoho kolekera ukwimba zinyimbu ziu kumwizominya mihiga ni mihiga mba.

¹⁰ Nyasaye alavunanyia zinguru ku vandu vachamu, navuzwa zinguru zia vandu valungi zilanenehizwa ligali.