Zaburi 74 - KITABU KITAKATIFU

Lisaala liokohonyia kivala

¹ O, Nyasaye, kigira ki okoleki ligali kuli ndi? Kigira ki usinyikiraa avandu vovo?

² Wizulizi avandu vovo va watovola kutura kale ava ivi watuliza mu vuhambe, kuva mwangu gugwo! Wizulizi kiguru cha Ziyoni aha wamenyaa.

³ Genda ku manyange yaga; avasigu viitu vamali kwononyia vuli kindu mu Litembeli.

⁴ Avasigu vovo vaahumi kuli zisimba mu vuguuti mu Litembeli liilio; vamali kuviika zibendera ziavo umwene yimwo kuli kelolero chi liguuta.

⁵ Valoreka kuli avatemi vi misaala, avatemaa misaala ni zimbazi ziavo.

⁶ Vaatumikira zimbazi ziavo kandi izinyundu zinditu iziatanyiaa amagina ukuvunaanyia miliango ji Litembeli ijizimbaho.

⁷ Vasamba Litembeli liilio litakatifu nu muliru; vononyia Hatakatifu hoho ha usigamirwa.

⁸ Vavoola mu mioyo jaavo, “Kulavaduvulanyia ligali!” Vasamba vuli havundu hatakatifu ha ivi Nyasaye usigamirwa mu kivala choosi.

⁹ Viju vietu vitakatifu viosi viagota; sihaveeyeho na vaporofeti avatigara kali mulala mba. Kandi sihaveeyeho nu mulala ku kunyi umanya yaga galava kuli ndi kuduuka ing'inga ki mba!

¹⁰ O, Nyasaye, avasigu viitu, valakokolera kehenyahenye kuduuka ng'inga ki? Valanyega lieta liilio mihiga ni mihiga?

¹¹ Kigira ki ivi usuyi kokokonya? Kigira ki utanyiira mukono gugwo kuvo.

¹² Navuzwa ivi O, Nyasaye, oveeye mwami wiitu kutura kale; ivi wakola manyingi kokohonyia haali kanyingi.

¹³ Ivi waavukanyia inyanza kuzinguru zizio zinene; wasionolanyia imitwi ji miyoka minene ju mu inyanza.

¹⁴ Ivi wasionolanyia mutwi gwa Leviazani; Nuhaana muviri gwagwo kuva chukulia chi zinyama ziu mu changalangwe.

¹⁵ Ivi wakola visinukiru via mazi notogera kwituruka; kandi wuminya migera minene ligali.

¹⁶ Umbasu nu gugwo, uvudiku nu vuvwo; ivi wasingiriza iliuva numweli mu vogono vwavio.

¹⁷ Ivi wavika zinzako ziosi zie lirova; kandi waviikaho ing'inga yu umbasu nuvukindu.

¹⁸ Navuzwa, O, Yahova, wizulizi ndi avasigu vovo vakosekerizaa, avandu vasiru vaanyegi lieta liilio.

¹⁹ Kunyi koveeye avadedekere kuli likuulu, utakolekera vasigu viitu mba. Utivilira livamwoyo lia vandu vovo avadambizwa mihiga ni mihiga mba!

²⁰ Wizulizi lilagana lia walomba ni kunyi. Haveeye ho nuvutindi vuli havundu hi kisundi mu kivala.

²¹ Utaleka avadambizwa vave mu zisoni mba; leka avadaka na avilienya vakwizominyi.

²² Singira, O, Nyasaye, na wesoole ivi mwene. Wizulizi ndi avandu avatamanyi ivi Nyasaye vakokolera kehenyahenye, muvasu gwosi.

²³ Utivilira lihanzuka liu vutima lia vasigu vovo; utivilira liyoga lia vasigu vovo vazizagiliraa kokora mba.