Zaburi 73 - KITABU KITAKATIFU

KITABU CHA KAVAGA Zab. 73—89 Uvulungi vwa Nyasaye

¹ Nyasaye aveeye mulahi ligali ku vandu veve, Isiraeli, ku yavo avaveeye avanifu mu mioyo.

² Navuzwa ndaali ahimbi kogotiza lisuuvira liange;

³ lisuuvirizwa liange liali ahimbi kogota, kigira ndaali ni likendeka ku avigingiri lwa ndaalora lizizagilira lilahi lia avandu vadamanu.

⁴ Sivaveeye nu vuzunu mba, navuzwa vaveeye avagulu kandi avalamu.

⁵ Sivaveeye nu vudinyu vwa vandu vandi vaveeye navwo mba, kandi sivaveeye nu vusaliri kuli avandu vandi mba.

⁶ Ku lwa yago, vaveeye niliegingira kandi luyaayi lwavo loveeye kuli amadongolo mu magoti gaavo, kandi vaveeye ni liegingira lie kirage kuli iganza.

⁷ Mioyo jaavo jayizula vudamanu ligali, kandi zing'anagani ziavo zilohizaa kokora uvudamanu kazozo.

⁸ Vamoloma vindu viu vudamanu, kandi vasekeriza avandu vandi, vaveeye ni liegingira kandi valohiza kudambiza avandi.

⁹ Vamoloma amakuva gu vudamanu ku Nyasaye wu mwigulu, kandi vahaana amalago gu kwigingira ku avandu vu mulirova.

¹⁰ Ku lwa yago, avandu va Nyasaye vazizaa kuvo nu kuvizominya, kandi vasuuvira mu goosi gavavoraa.

¹¹ Avandu vadamanu vavoola ndi, “Nyasaye siunyala kumanya mba; Nyasaye oveeye igulu ligali sianyala kumanya aga kokoraa mba.”

¹² Nindio avandu vachamu vaveeye; avaveeye mu lielemeriza kazozo, kandi vameedeka uvutugi vwavo vuli ing'inga.

¹³ Yaga goosi gaveeye gavuzwa, inzi kwinihiza mu mwoyo gwange, kandi sihaveeyeho nuvwoni mu inzi mba.

¹⁴ O, Nyasaye, ivi umali konomba saliri lidiku liosi; kandi umali kuhaana amageri ku inzi vuli mugamba.

¹⁵ Inzi ndava ni ndavoora amakuva yaga, ngano singolaa kuli mulala ku vandu vovo mba.

¹⁶ Ndaageriza kuganagana ku vudinyu yivu, navuzwa vwali vudinyu ligali ku inzi,

¹⁷ kuduuka lwa ndaazia mu Litembeli liilio. Maku ndaamanyiriza agaaza gekoleke ku avandu vachamu.

¹⁸ Ivi umali kuvaviika havundu haterere ligali, kandi uvakoli vagwi nu kudiva ligali!

¹⁹ Vaagwiyi nukwoneka nonoho; kandi vamali kugwa mu likuza liukutihiza ligali.

²⁰ Avandu vadamanu yava vaveeye kuli amalooto agivirirwa mu ing'inga yu mugamba, O, Yahova, lwa ivi uvukaa, vatulaa ho.

²¹ Lwa ndaali mu zing'anagani zinyingi, mwoyo gwange gwatumitwa no vovereri,

²² ndaali musiru kuli inyama yu mbulimu; sindakumanyiriza mba.

²³ Navuzwa inzi mbeeye harara nivi kazozo, kandi ivi ungumiyi mukono gwange mulungi.

²⁴ Ivi unzimiliraa na amigizu googo, kandi ulanyingiriza nu luyali lulwo ing'inga yi keheri chi limenya liange.

²⁵ Nivwaha wa inzi mbeeye naye mu ligulu nataveeye ivi? Lwa inzi mbeeye ni ivi, ni kinduki cha inzi nyenya ku lirova?

²⁶ Zing'anagani ziange nu muviri gwange vinyala kuva videdekere, navuzwa Nyasaye aveeye zinguru ziange, niyie weng'ine wa inzi nyenya mihiga ni mihiga.

²⁷ Henza, yavo avalekaa ivi valadiva ligali. Ivi uladiviza ligali yavo avataveeye avasuuvirifu ku ivi.

²⁸ Navuzwa ku inzi vuveeye vulahi ligali kuva ahimbi ku Nyasaye; konyoora likingwa ku Yahova Nyasaye Wuvunyali nukulandiza ndavoora vindu viosi viokogenyia viamali kokora.