Zaburi 72 - KITABU KITAKATIFU

Lisalira mwami

¹ O, Nyasaye, wigize mwami kukalaga nuvulungi vuvwo; ohe mwana wu mwami uvulungi vuvwo,

² kunangwa aduuki kwamiiha avandu vovo ni likalaga liuvulungi, kandi kwamiiha avadambizwaa nuvulungi.

³ Leka kivala keve nu uvutugi, leka vigulu vileetere avandu uvulungi; utugulu twizuli uvulungi.

⁴ Leka mwami akalagiri avadaka vulahi; leka akonye avilienya kandi aguuti avadambizi vaavo.

⁵ Leka avandu vovo vakusigamiri mihiga ni mihiga kandi lwu mweli gwakaa ku makura goosi.

⁶ Leka mwami ave kuli imbura ikubaa ku vunyasi vukalagiywi, ave kuli lunyilira lusamaa lirova!

⁷ Leka uvulungi vomeedeke mu ing'inga yi livamwoyo lilie kandi uvugasu vuhindiri lwu mweli gwakaa mihiga ni mihiga.

⁸ Uvwami vwivwe vuladuuka kutura kunyanza kuduuka kunyanza, kutura ku mugera gwa Efurate kuduuka ku keheri chi lirova.

⁹ Avasigu veve avamenyaa mwigendanyama valinama imbiri weve. Avahing'ani veve valagwa mam'mama imbiri weve.

¹⁰ Avami va Sipeini na vivisulu valamuha vihaanwa; avami va Sheba na Seba valamuleetera vihaanwa.

¹¹ Avami vosi valinama imbiri weve; zihiiri ziosi zilamutumikira.

¹² Ahonyia avadaka vaaniraa kuye; kandi ahonyia yavo avaveeye ni lienya kandi avataveeye novokonyi.

¹³ Averereraa avadedekere navadaka ahonyia livamwoyo lia yavo avaveeye mu vudinyu.

¹⁴ Mwami avahonyiaa kutura mu lidambizwa kandi lisalirizwa; kigira livamwoyo liavo liveeye liuvuguli vudinyu ligali imbiri weve.

¹⁵ Mwami ahindiri ligali! Ahevwe izahabu kutura Sheba; avandu vamusaliri masaala zing'inga ziosi; uvugasu vwa Nyasaye vove kuye kazozo.

¹⁶ Leka have nuvuswage vunyingi mu kivala; vigulu vizuri ligesa kuli lie kiguru cha Lebanoni. Leka madaala manene gizuri avandu kuli milimi gizuyi uvunyasi!

¹⁷ Leka lieta liu mwami lizulizwi mihiga ni mihiga; ulusuma lwilwe luhindiri kuli liuva! Leka zihiiri ziosi ziteeve Nyasaye azigaasizi kuli amali kugasiza mwami!

¹⁸ Yahova, Nyasaye wa Isiraeli yizominywi! Niyie yeng'ine okolaa vindu viokogenyia yivi.

¹⁹ Lieta lilie liuvukumi lizominywi uvukumi vwivwe vwizuli lirova liosi. Amini! Amini!

²⁰ Yiki nicho keheri chi lisaala lia Daudi muyayi wa Jese.