Zaburi 71 - KITABU KITAKATIFU

Lisaala liu musakulu

¹ O, Yahova, nziza ku ivi ukingi inzi; utaleka avasigu vange vanguuti mba!

² Ombonyie kandi ongonye mu uvulungi vuvwo. Umbulirizi na ombonyie.

³ Ove kuli lwanda lwu vuhaliru vwange. Ove imbinga yange yizingulu yokombonyia ivi oveeye lwanda lwange kandi imbinga yange.

⁴ O, Nyasaye wange, ombonyie kutura ku avandu vadamanu, kuzinguru zia vadamanu kandi avalulu.

⁵ O, Yahova Wuvunyali, inzi suuviraa mu ivi. Inzi mali kusuuvira mu ivi kutura vwana vwange.

⁶ Nzeredaa ku ivi mu livamwoyo liange liosi; ivi waakinga inzi kutura lidiku lia ndiivulwa. Inzi ndakwizominya kazozo.

⁷ Livamwoyo liange iveeye kelolero ku avanyingi; kigira ivi oveeye mukingi wange wizingulu.

⁸ Inzi nzizominyaa ivi lidiku liosi kandi, nandizaa uvukumi vuvwo.

⁹ Utaasuula kalunu kigira mu vusakulu vwange mba; Utaandeka kalunu lwa mbeeye mudedekere mba.

¹⁰ Avasigu vange venya kunzita; vamoloma uvudamanu ku inzi nukuunziira hasi.

¹¹ Vavoola, “Nyasaye umuleki, gendi kumulondelere na kumugumiri; sihaveeyeho numulala wukumuhonyia.”

¹² O, Nyasaye, utamenya ihale ku inzi mba. O, Nyasaye wange, kola vwangu ongonye.

¹³ Leka avanyingiliraa vaguutwi kandi vadivizwi. Leka yavo avagerizaa kusaliriza vakolwe vaduuki mu zisoni kandi valeganywe.

¹⁴ Navuzwa inzi ndasuuvira ivi kazozo; ndakwizominya ligali.

¹⁵ Inzi ndavolera avandu amakuva gi vindu vilahi via ivi umali kokora. Ndalandiza amakuva gi vikolwa vivio vio vohonyi lidiku liosi, Kali niviva niviveeye vinyingi ligali kuvita limanya liange. O, Yahova Wuvunyali, inzi ndaaza nukulandiza vikolwa vivio viezingulu.

¹⁶ Inzi ndazia mu zinguru zia Yahova Nyasaye uvulahi vuvwo, vuvwo weng'ine.

¹⁷ O, Nyasaye, ivi wamala kunzigiza vikolwa viokogenyia kutura lwa ndaali mwana, kandi ngizizagiliraa kulandiza makuva gi vikolwa vivio viokogenyia.

¹⁸ O, Nyasaye, kalunu lwa mbeeye musakulu, niliisu liange liveeye zimbuzi utaandeka mba! Ove harara ninzi lwa nandizaa amakuva gi zinguru kandi guvunyali vuvwo, ku makura goosi gaaza.

¹⁹ O, Nyasaye, zinguru zizio, zidukaa igulu mwigulu; Ivi umali kokora vindu vinene ligali; siahaveeye ho voveeye kuli ivi O, Nyasaye.

²⁰ Ivi umali kumbika mu vudinyu vululu ligali kandi nuvusaliri vunyingi. Navuzwa ulanziranyira zinguru; ulambonyia kutura mu likuza.

²¹ Ivi ulaanenehiza kuvita kase, ulaleminya mwoyo gwange kandi.

²² Ndakwizominya ligali nuvukana; O, Nyasaye wange, ndizominya uvusuuvirifu vuvwo. Ndakubira ivi zinyimbu ziu kukwizominya ku lidungu liange. O, ivi Nyasaye Mutakatifu wa Isiraeli.

²³ Inzi ndahanzuka kigira uvusangari lwa nyimbaa lizominywa liilio ku vukana; ndimba nu mwoyo gwange gwosi kigira ivi umali kombonyia.

²⁴ Inzi ndavoora amakuva gu vulungi vuvwo lidiku liosi, kigira yavo avagerizaa kusaliriza, vaguutiywi kandi vaaleganyiywi.