Zaburi 7 - KITABU KITAKATIFU

Lisaala kigira likalaga lirungi

¹ O, Yahova, Nyasaye wange, nziza ku ivi ombe likingwa; Osoore kandi ombonyie ku yavo vosi avanondeleraa.

² Gase valang'inga kuli isimba, nukumbila havundu hu mundu atanyala kombonyia, na uwene yeyo, valandandulanyia mu vidonye.

³ O, Yahova Nyasaye wange, niiva ndaakola makuva yaga, niiva ndaakolera mundu vwosi vudamanu,

⁴ niiva ndakora uvudamanu ku mulina wange, anoho kulanya musigu wange vugira kivuni,

⁵ hene yaho, leka vasigu vange vanondelere nukung'umira, kandi oleke vanduvagiri hasi nukunzita, kali valeke muviri gwange mukuzu ku marova!

⁶ O, Yahova, vuka mu vutima vuvwo! Singira uhing'ane nu vutima vonene vwa vasigu vange; vuka ivi O, Nyasaye wange na ongonye! Ivi wenya vulungi vwekoleke.

⁷ Kunangwa, leeta harara avandu vosi vakukumbirizi, ma uwaamiihi kutura igulu.

⁸ Ivi O, Yahova ukalagiraa zihiiri ziosi ungalagiri kolondekana nuvulungi Ivi Wuvunyali umanya ndi inzi mbeeye vugira imbara.

⁹ Ivi Nyasaye oveeye mulungi, kandi umanya zing'anagani zietu ziosi ni likayirwa lietu. Heriza uvudamanu vwa vandu vadamanu kandi uhaane madanyi malahi ku valungi.

¹⁰ Nyasaye aveeye likingwa liange, ahonyia yavo avaveeye valungi mu mioyo.

¹¹ Nyasaye aveeye mukalagi mulungi, na akalagira avachamu kazozo.

¹² Niiva sivalagirung'anyia zinzira ziavo zindamanu, Nyasaye alahiagala kivavi chiche. Amali kunyiira uvuta vwivwe vwetegeki kulasa.

¹³ Avugulaa viugi vivie vielikuza nukwetegekiza mivano juvuta vwivwe ijiveeye kuli lomemo lwumuliru.

¹⁴ Henza kuli avandu vachamu vaganagana kokora vudamanu. Valohizaa zinzira zia vavikira mu avandu mu kivi kandi vakora uvugadi.

¹⁵ Navuzwa yavo aveene vamali kugumirwa mu mitego ja valombera avandi.

¹⁶ Kunangwa vahevangwa mageri malulu kigira uvudamanu vwavo aveene, kandi vasalirizwa nu vutindi vwavo aveene vwa vakolera avandi.

¹⁷ Sandizaa Yahova Nyasaye kigira uvulungi vwivwe mu likalaga. Nyimbaa zinyimbu zie lizominya ku Yahova oveeye igulu ligali.