Zaburi 69 - KITABU KITAKATIFU

Lianira vokonyi

¹ Ombonyie, O, Nyasaye ombonyie! Amazi gaduuki mwigoti mwange;

² nziyinaa mu vodohi vwe kedende, kandi sihaveeye ho nahavundu hadinyu ahanyala koseena kerenge change mba. Mali kwiyina mu luliva lwa mazi kandi viguvuli viveeye ahimbi kumbira.

³ Inzi nduhi kuturana ni lianira kigira ovokonyi. Mwigoti mwange mulumaa, zimoni ziange zizengeye kigira lilindilira vokonyi kutura ku Nyasaye.

⁴ Yavo avandunyira vugira kivuni, vaveeye avanyingi ligali kali kuvita liisu liu kumutwi gwange. Avasigu vange vavoola ovovehi ku inzi; vaveeye ni zinguru ligali kandi venya kunzita. Vamali konomba kali kwilanyia ivindu viandavula kwiva.

⁵ O, Nyasaye, Ivi wamanya uvusiru vwange. Uvwoni vwange sivuvisiywi ku ivi mba.

⁶ O, Nyasaye Wuvunyali utaleka ndete zisoni ku yavo avasuuviraa mu ivi mba! O, Nyasaye wa avandu va Isiraeli, Utaleka ndete lileganywa ku yavo avasigamiraa ivi mba!

⁷ Inzi mali konyegwa kigira ivi, kandi mbeeye mu zisoni zinene ligali.

⁸ Inzi mbeeye mugeni ku avamwavo vange, kandi mugeni ku vandu vi nyumba yange.

⁹ Uvuha vwange vwu kuyaanza Litembeli liilio vwaduuka mu mwoyo gwange kuli umuliru; amanyego ga yavo avanyegaa ivi, gamali kuduuka kali ku inzi.

¹⁰ Lwa inzi nzegehizaa umwene imbiri woovo mu lihonga lilia, avandu vanyega.

¹¹ Lwa nziviikaga zinguvu zia magunia avandu vasekeriza.

¹² Vamoloma makuva gange kuzinzira, kandi avahambiku valomba zinyimbu ku inzi.

¹³ Navuzwa inzi O, Yahova, ndasaara ku ivi. O, Nyasaye, yaanza undivuliri lisaala liange mu ing'inga ya ivi mwene otovola. O, Nyasaye, yaanza undili kigira vuyanzi vuvwo ovonene ku inzi, kigira ivi unduukizaa lilagana liilio lio kohonyia.

¹⁴ O, Yahova, ombonyie mburi kusikira mu kedende, kandi mbule kwiyina musi mwululiva lwa amazi, osoore ku vasigu vange.

¹⁵ Utaleka amazi manene gizuyi gambiri mba, onoho nziyini musi mwululiva lwa amazi mba, kandi kilindwa kitangunika mba.

¹⁶ O, Yahova, undivuliri makuva gilianira liange, mu vulahi vwu vuyanzi vuvwo vutaveeye ne keheri. Kolondekana ni zimbavasi zizio, yaanza ombonyie.

¹⁷ Utiivisa umwene ku inzi mutumikiri woovo mba; mbeeye mu vudinyu vonene ligali; yaanza uhaane mativuli ku lianira liange kalunu.

¹⁸ Hamba ku inzi, na ombonyie, osoore ku vasigu vange.

¹⁹ Ivi umanyi kuli inzi mali konyegwa, kandi kuli mali kuvikwa mu zisoni kandi kuli mali kolegaanywa; Ivi umanyi avasigu vange vosi.

²⁰ Amanyego gamali kuvunaga mwoyo gwange, kandi mali kukuza mwoyo. Ndasuuviraa ndanyoora liverererwa, navuzwa siliali ho mba; ndasuuviraa konyoora lileminywa mwoyo, navuzwa sindalinyoola mba.

²¹ Lwa ndaali ni inzara, vaamba chukulia kilulu kuli isumu; kandi lwa ndaali nu vuluhu, vaamba chukunwa kilulu kuli isiki.

²² Lwa valiza lilia liavo, leka vagumirwi kuli linyonyi mu mutego. Lwa valiza inyama yi kisiuviriru kihanwa ku Nyasaye, leka vave kuli zinyama zigumirwa mu mutego.

²³ Leka zimoni ziavo zivakuli, kunangwa vavuli kolola; kandi okole migongo jaavo jiname, na ivirenge viavo videgere ligali kazozo.

²⁴ Viika uvutima vuvwo kuvo, kandi oleke uvutima vuvwo vululu vuvagumiri.

²⁵ Wononyie hokososa haavo, mundu kali mulala atalekwa mwoyo mu mahema gaavo mba.

²⁶ Vadambizaa oyo wa ivi umali kuha amageri, vameeda uvusaaliri ku yavo ava ivi umali kwata ologoma.

²⁷ Uvameede amageri ligali ku vudamanu vwavo, utaleka vanyoore ovohonyi vuvwo mba.

²⁸ Tuliza ho amita gaavo mu kitabu cha avaveeye mwoyo; kandi vatavalizwa harara na avandu vovo valungi mba.

²⁹ O, Nyasaye, mbeeye mu vuzunu vululu kandi mu likuza mwoyo, O, Nyasaye ungoonye kandi ombonyie mu vuhimwa.

³⁰ Inzi ndizominya Nyasaye nu lwimbu, ndalandiza ovonene vwivwe ku lihaana lisaandiza kuye.

³¹ Yaga galayaanziza Yahova kuvita kumuha zing'ombe, kuvita kuhaana igiriki imbindira kuli kisiuvilu chu kusambwa.

³² Lwa vandu vadambizwa valora yaga, valava nu vusangali; kandi yavo avasigamiraa Nyasaye valadinyirizwa.

³³ Yahova ahulirizaa lisaala lia yavo avaveeye vadaka, kandi si yiviliraa avandu veve avaveeye mu vuhambe mba.

³⁴ O, munyi ligulu kandi lirova, mwizominye Nyasaye. Mwizominye Nyasaye, munyi zinyanza ni vilombe viosi muzio.

³⁵ Nyasaye alahonyia avandu va Jerusalemi kandi alumbaka uvuhia amadara gi Ivuyuda; Avandu veve valavugula kivala zana, kandi valamenya mu mihiga ni mihiga.

³⁶ Ivisukulurwi via avatumikiri va Nyasaye valanyora miandu ji kivala yiki, kandi yavo avanyanzaa valamenya yo.