Zaburi 68 - KITABU KITAKATIFU

Lwimbu lwi liguuta

¹ Nyasaye asingiraa nasalanyiaa vasigu veve. Yavo avamudunyira virukaa muliguutwa!

² Kuli mwochi guhuzangwa ihale, nindio akungaa avasigu veve. Kuli ihura isalulukaa imbiri wu muliru, nindio avachamu vakuza imbiri wa Nyasaye.

³ Navuzwa avalungi vazanzalikaa nivasangala imbiri wa Nyasaye; vaveeye nuvuyanzi kandi vahanzuka kigira uvusangari.

⁴ Mwimbiri Nyasaye, mwimbi zinyimbu ziukwizominya Nyasaye mulungikize inzira ya uyu uninaa mu malesi lieta lilie ni Yahova; musangare imbiri weve!

⁵ Nyasaye, omenyaa mu Litembeli lilie litakatifu, aveeye mulindi wa vavisandu kandi mukingi wavakunzakari.

⁶ Nyasaye ahaanaa ku vadambi hango ho komenya, avohololaa avahambe nukuvaha uvweremelizi. Navuzwa avibaali valamenya mu changalangwe.

⁷ O, Nyasaye, lwa wimilira avandu vovo, lwa waazia kuvitira mu changalangwe,

⁸ lirova liadegera kandi ligulu liasundura imbura; kigira ivi weng'ine O, Nyasaye wa Isiraeli, wivuula umwene ha kiguru cha Sinai.

⁹ Ivi waakubiza imbura inyingi, kandi nuwiranyia viamo ku kivala ichaali nichuma kigira mbasu.

¹⁰ Avandu vovo vaatanga komenya yo, kandi waali muhaani ku vosi avaari vadaka kigira vulahi vuvwo.

¹¹ Yahova yalaga, na avakali vanyingi valandiza makuva zana:

¹² Avami na mahi gaavo viiruka! Avakali mu hokososa haavo vagavulana vilaanye:

¹³ Kali niiva vaatigara mu vigo via magondi, vagavulana vilanye kuli zimbaha zia makuulu ziavakwa ifeza, na amavaha gazio gaavakwa izahabu indahi.

¹⁴ Lwa Nyasaye Wuvunyali yaasalanyia avami ku kiguru chi Zalimoni, yakola likonza ukugwa yo.

¹⁵ kiguru cha Bashani keveeye kiguru kenene cha Nyasaye; keveeye kiguru chi zindongozi zinyingi!

¹⁶ Kigira ki mukendekelaa kiguru cha Nyasaye yatovola komenya mu mihiga ni mihiga?

¹⁷ Yahova yaazaa kutura ku kiguru cha Sinai kuduuka havundu hatakatifu, harara ni zielefu zizie zinyingi zia magare geege gizingulu.

¹⁸ Yanigiraa igulu mwigulu navugura avahambe va yalaanya vanyingi harara naye, avugulaa vihaanwa kali kutura ku vibaali. Yahova Nyasaye alamenya ho.

¹⁹ Yahova yizominywi, ugingaa misigo jietu vuli lidiku. Aveeye Nyasaye okohonyiaa.

²⁰ Nyasaye wiitu aveeye Nyasaye ohonyia, aveeye Yahova, mwami wiitu, okohonyiaa kunyi kutura mu likuza.

²¹ Nyasaye alavunanyia mitwi ja vasigu veve aladuvulanyia mitwi ja yavo avazizagilira komenya mu zinzira ziavo ziuvwoni.

²² Yahova umali kovora, “Ndilanyia avasigu vinyu kutura Bashani; ndavilanyia kandi kutura mu luliva lwinyanza,

²³ kunangwa muduuki kogenda mu masahi gaavo, na izimbwa zienyu ziduuki kokomba masahi gavasigu vovo kuli zienya.

²⁴ O, Nyasaye, ligenda liilio lie liguuta limali kololeka ku vosi, igwaride ya Nyasaye, umwami, kuduuka Hatakatifu hehe.

²⁵ Aviimbi vaveeye imbiri, avakubi uvukana vwi zinyimbu vaveeye inyima hagati haavo, vaveeye ho avakaana vakuba zitamburini.

²⁶ Nyasaye yizominywi mu livugana linene lia vandu veve. Mwizominyi Yahova, O, munyi kisukururwi cha Yakobo!”

²⁷ Avukutanga kuuza vaali avandu vihiiri ya Benjamini, ihiiri engekeeke ligali kuvita ziosi, maku viimiliri vihiiri ya Yuda harara numuganda gwaavo nivalondangwa na aviimiliri vihiiri ya Zabuloni na Nafutali.

²⁸ Manyia zinguru zizio O, Nyasaye, zinguru zia umali kutumikira muvogono vwitu

²⁹ kutura mu Litembeli liilio mu Jerusalemi; uwa avami valeta vihaanwa ku ivi.

³⁰ Ugaye Egebeti, zinyama ziveeye mu vidundu! Ugaye zihiiri, iziveeye kuli kiduma chi zigiriki harara nivimoli viazio. Kuduuka lwa vosi vegehiza aveene, nukuhaana ku ivi vidonye viavo viefeza. Salanyia avandu yavo avayaanzaa kolomba uvulwani!

³¹ Avanene valaza kutura Egebeti avandu va Ezopia valanyira makono gaavo mu lisaala ku Nyasaye.

³² Munyi avandu vi vivala viosi vie lirova, mwimbiri Nyasaye; mwimbi zinyimbu zie lizominywa ku Yahova,

³³ ku uyu uninaa igulu mwigulu, ligulu liveeye lia kale. Mumuhulirizi lwa ahanzukaa nu mwoyo munene.

³⁴ Mulandizi ndi Nyasaye aveeye wizingulu ligali; uvukumi vwivwe ku Isiraeli. Uvwerefu vumanyia zinguru zizie.

³⁵ Nyasaye aveeye wukutihiza ligali lwa atulaa u Hatakatifu hehe Nyasaye wa Isiraeli! Ahaanaa zinguru nuvunyari ku vandu veve. Nyasaye yizominywi!