Zaburi 66 - KITABU KITAKATIFU

Lwimbu lwu kusandiza nu kwizominya Nyasaye

¹ Avandu vosi, vizominye Nyasaye nu vusangali!

² Mwimbi uvukumi vwi lieta lilie, muhaane kuye lizominya liu vukumi.

³ Mu voole ku Nyasaye; “Vindu via okolaa viveeye viokogenyia! Zinguru zizio ziveeye zinene ligali! Kali avasigu vovo vinamaa imbiri woovo mu vuti.

⁴ Avandu vosi ku lirova valakusigamira; valimba nu kwizominya ivi, valiimbi zinyimbu zie lizominya ku lieta lilio.”

⁵ Hambi mulole aga Nyasaye amali kokora, vikolwa vivie viveeye viokogenyia hagati ha avandu.

⁶ Nyasaye yagilung'anyia inyanza nigwa kivala chumu, na avaguuga viitu vaambuka mugera ku virenge. Hene yaho kwasangala kigira ku goosi aga yakola.

⁷ Nyasaye yamiha ni zinguru zizie mihiga ni mihiga, kandi zimoni zizie zihenzaa ku zihiiri ziosi. Avibaali vatahing'ana naye mba.

⁸ Zihiiri ziosi kwizominye Nyasaye wiitu! Leka lizominya lienyu liduuki kuhulika!

⁹ Nyasaye umali kuhaana livamwoyo ku kunyi, kandi siakuviiki mu lidiva mba.

¹⁰ O, Nyasaye, ivi umali kukuvika mu ligerizwa, kuli ifeza isambangwa mu muliru ma iloleka inifu. Nindio kandi ivi okogerizi.

¹¹ Ivi wakukokola kugwa mu mutego, kandi umali kuviika misigo miliduhu ku kunyi.

¹² Ivi waleka avasigu viitu kukuduvagira hasi; kwavitira mu muliru kandi mu amazi amanene, navuzwa kalunu, ivi umali kokoleta havundu hi mirembe.

¹³ Ndaleta mu Litembeli liilio vihaanwa viu kusambwa; ndahaana ku viandalagana nivi.

¹⁴ Ndahaana ku ivi viosi via ndalaga ndakuha lwa ndaali mu vudinyu.

¹⁵ Ndahaana amagondi gasambwa ku vwali vuvwo, ndahaana visiuviliru vie zigiriki kandi zimburi, na umwochi gulavuuya kuduuka mu malesi.

¹⁶ Avandu vosi avasigamiraa Nyasaye, hambi muhuliri, na inzi ndamuvolera goosi aga amali kongolera.

¹⁷ Ndanira kuye yangonye, kandi ndamwizominya mu liemba zinyimbu

¹⁸ ndava wavisa uvwoni mu mwoyo gwange, ngano Yahova si yahulira lisaala liange mba.

¹⁹ Navuzwa, gaveeye gi ligali Nyasaye umali kumbulira, kandi ahuliri lisaala liange.

²⁰ Lizominywa live ku Nyasaye; kigira siyasuura lisaala liange mba, anoho siatuliza ku inzi uvuyanzi vwivwe vutali ne keheri.