Zaburi 65 - KITABU KITAKATIFU

Lizominya kandi lisandiza

¹ O, Nyasaye, gaveeye vulungi ku kunyi kwizominyira ivi mu Ziyoni; nuladukiza malagano giitu ku ivi,

² kigira ivi ukutivuliranga amasaala giitu. Avandu kutura havundu hoosi valaza ku ivi

³ kusaala kigira uvwoni vwavo. Lwa mahiolo giitu gakoyembelela, ivi ukusaamihaa.

⁴ Vaveeye nuvugasu yavo avaotovolanga, nukuvaleeta vaduuki komenya ahatakatifu hoho. Kunyi kulakigutizwi ni vindu vilahi iviveeye munyumba yooyo, uvugasu vwi Litembeli liilio litakatifu.

⁵ O, Nyasaye, ivi ukutivuliranga ku likuha uvuguuti, kandi okolaa vindu viokogenyia okohonyia kunyi. Avandu ku lirova liosi, kandi engereka wi zinyanza zie ihale vasuuvira mu ivi.

⁶ Ivi usingirizaa vigulu nizinguru zizio. Ivi oveeye nizinguru zinene ligali.

⁷ Ivi ohomatizaa lifuma lie zinyanza kandi ukiring'anyia liyoga lie viguvuli. Ukiring'anyia kandi kivihiri cha vandu.

⁸ Avandu vosi vi lirova vagenyaa ku vikolwa vivio vinene via umali kokora. Vikolwa vivio viokogonyia vileetaa uvusangari kutura ku keheri kilala chi lirova kuduuka ku ikindi.

⁹ Ivi ulindaa kivala ku likikubizira imbura. Ivi okekolaa keve kitugi kandi kigunamu wizulizaa amazi mu migera jijo; Ohezaa avamenyaa ku lirova vitagwa. Ni ndi ivi okolaa:

¹⁰ Ukubizanga imbura inyingi mu milimi jilimiywi nukujisama na mazi, odotizaa amalova nulunyilira, kandi ugasizaa malova ku likora vitagwa vidoto kuviruka.

¹¹ Kigira ivi oveeye mulahi, ohezaa kunyi ligesa lilahi ligali hoosi ahuvitiraa, uvunyingi vwi vindu vilahi vomedeka.

¹² Uvwayiru vwosi vwizuyi mitugu; ivigulu navio vizuyi uvusangari.

¹³ Milimi jikunikiywi na magondi, mavoona gizuyi ingano. Vindu yivi viosi vilava kuli avandu vahanzukaa nukwimba lisandiza liavo ku Nyasaye.