Zaburi 63 - KITABU KITAKATIFU

Uvuluhu vwukwenya Nyasaye

¹ O, Nyasaye, ivi oveeye Nyasaye wange. Na inzi ngwenyererizaa nu mwoyo gwosi. Mwoyo gwange goveeye nuvuluhu vonene ku ivi. Liiva liange liosi liegombanga ivi kuli kivala ichumu, kuli ichangalangwe chegombaa amazi.

² Leka ngolole ahatakatifu hoho, leka ndore zinguru zizio kandi uvukumi vuvwo.

³ Uvuyanzi vuvwo uvutali nekeheri voveeye uvulahi kuvita livamwoyo liene, nandio ndizominya ivi ligali.

⁴ Ndakusandiza mu livamwoyo liange liosi, ndaginga makono gange igulu ku ivi mu lisaala.

⁵ Mwoyo gwange gulalia nukwiguta kuli mulala ulizaa uvuhale nizitinya mu lilia, na ndimba zinyimbu ziu vusangali mu lizominya ivi.

⁶ Lwa ng'onaa mu kidali change, nzizulizaa ivi; ng'anaganaa ivi uvudiku vwosi,

⁷ kigira ivi oveeye mukonyi wange kazozo mu chiriri chi zimbaha zizio, nyimbaa kigira uvusangari.

⁸ Ndahaanda vuzwa ku ivi, mukono gugwo mulungi gukingaa inzi.

⁹ Navuzwa yavo avagerizaa kunzita, valazia musi mu kivala cha avakuzu.

¹⁰ Valitwa nikivavi mu vulwani; na imiviri jaavo jilaliivwa ni zimbiti.

¹¹ Mwami alasangala ligali kigira Nyasaye alamuha liguuta, yavo vosi aviisuhaa mu lieta lia Nyasaye, valamwizominya; navuzwa Nyasaye alahana minwa ja vavehi.