Zaburi 62 - KITABU KITAKATIFU

Lisuuvira mu likingwa lia Nyasaye

(Izaburi ya Daudi)

¹ Nindiliraa Nyasaye nuvwikuziri ligali, yambonyie; ovohonyi vwange vutulaa kuye yeng'ine.

² Oyo niyie yeng'ine oveeye mukingi wange kandi umuhonyi vwange ombonyiaa; aveeye imbinga yange; sindaguutwa ligali mba.

³ Mulingilira mundu kuduuka ng'inga ki? Munyi mwosi, mulamuzoma hasi, mundu oveeye kuli lidigi liyeekaa, kandi kuli lugaga lodengeyaa?

⁴ Munyi mwenya vuzwa kumwikiza kutura havundu hehe huluyali; munyi musangaliraa mu vovehi. Munyi mumolomaa amakuva gi ligasiza, navuzwa mu mioyo jinyu, mumulaamaa.

⁵ Nindiliraa Nyasaye nuvwikuziri ligali; kigira lisuuvirizwa liange litulaa kuye.

⁶ Oyo niyie yeng'ine oveeye lwanda lwange kandi ombonyiaa, oveeye imbinga yange, sindadengeyizwa ligali mba.

⁷ Ovohonyi vwange nuluyali lwange vituraa ku Nyasaye. Nyasaye aveeye mukingi wange wizingulu; aveeye uvuhaliru vwange.

⁸ O, munyi avandu vange, musuuviri mu Nyasaye zing'inga ziosi; mu muvoolere uvudinyu vwinyu vwosi Aveeye uvuhaliru vwitu vwi milembe.

⁹ Avandu vosi vaveeye vuzwa kuli umwika. Avanene navakekeeke keleng'ani sivaveeye kindu kitakonya vaviiki ku kibimu, na sivali nuvulitu mba; vaveeye avahuuhu vuzwa kuvita mwika.

¹⁰ Mutaviika lisuuvira lienyu litumikira lidambiza; mu lienyolera uvutugi mu vugadi mutasuuvira mu lienyolera vindu ku linuura. Kali niiva uvutugi vuvwo vomedeka, uteeleda kuvwo mba.

¹¹ Mali kuhulira haali kanyingi Nyasaye navoora, ndi zinguru ziveeye iziizie;

¹² kandi ndi uvuyanzi uvutali nekeheri voveeye uvwivwe. Ivi umwene, O, Yahova, utunganga sa mulala amadanyi kolondekana ku vikolwa vivie.