Zaburi 60 - KITABU KITAKATIFU

Lisaala inyima wi liguutwa mu vulwani

¹ O, Nyasaye, ivi umali kukusuura Ivi umali kuvunanyia likingwa lietu; Ivi waveeye nu vutima; mwaza, yaanza ukwiraniri.

² Ivi umali kokora kivala kedegere, kandi umali kukekola chadikane; kalunu, ohonyie zingwagu zialio kigira limali kuchatanyia.

³ Ivi umali kokora avandu vovo kusalira vululu ligali. Kuguyaguyaa vuzwa yiyi ni yiyi kuli avandu vahambiki iwaini.

⁴ Ivi umali ukwiganihiza yava avakutizaa; Kunangwa vaduuki kohononoka kutura ku lidivizwa.

⁵ Okohonyie nizinguru zizio; undivuliri lisaala liange. Kunangwa avandu va ivi uyanzaa vaduuki kohonywa.

⁶ Nyasaye wiitu umali komoloma kutura hatakatifu hehe: “Ndagavulanyia kivala cha Shekemu; na ndagavulanyia Livona lia Sukozi ku vandu vange kigira mali kuguuta.

⁷ Kivala cha Gileadi keveeye change kandi, kivala cha Manase; Efuraimu aveeye igudwa yange yikivia Yuda aveeye imbimbu yange yu vwami.

⁸ Navuzwa ndatumikira kivala cha Moabu kuli ebenzeni yange yukwisavira ku na ndalasa vilato viange ku Edomu, kuli kelolero ndi keveeye ichange. Ndahanzuka muliiguta avandu vi kivala cha Filisitia.”

⁹ O, Nyasaye wange, nivwaha umbilaa mu lidaala linene lie imbinga? Nivwaha unzimilira nduuki Edomu?

¹⁰ O, Nyasaye ligali Ive umali ku kusuura? Ivi na mahi giitu si ulazia ni kunyi kulwaana avasigu viitu?

¹¹ Okokonye, kuguuti avasigu viitu. Ovokonyi vwu mundu sivoveeye kindu kali hakuzu mba.

¹² Nyasaye naaveeye ku lovega lwiitu kulaguuta, alakuguutira avasigu viitu.