Zaburi 59 - KITABU KITAKATIFU

Lisaala liokwenya mirembe

¹ O, Nyasaye wange, ombonyie kutura ku vasigu vange! Osoore ku yavo avanyingiliraa.

² Ombonyie ku yavo avakolaa uvudamanu. Ombonyie kutura ku yavo avalumindi!

³ Henza! Vaambigiraa vaduuki kunzita; avandu vadamanu ligali, vavungaa harara vaduuki kuusaaliriza. Sigali ni kigira uvwoni kinga uvudamanu vwa ngoli mba,

⁴ Vanyagura zimbiru, nukwetegeka kunyingilira ku lihiolo litali liange. O, Yahova, singira, ongonye; henza ku vudinyu vwange! Na uuze kongonya welolere ivi mwene,

⁵ O, Yahova Nyasaye Wanyala Viosi Ivi oveeye Nyasaye wa Isiraeli. Vuka na uhaane mageri ku zihiiri ziosi; utamanyia livererera ku avazami vachamu yavo.

⁶ Viiranaa vuli hamugorova, nivalokaa kuli zimbwa, nivavoyavoya mu lidaala linene.

⁷ Huliriza ku amanyego ni litihiza liavo. Amakuva gaavo gaveeye kuli vivavi viugi mu minwa jaavo, navuzwa vaganagana ndi mundu siavahuliraa mba.

⁸ Navuzwa Ivi, O, Yahova, uvasekaa; Ivi okolera zihiiri ziosi kehenyahenye.

⁹ O, Nyasaye, mbeeye nilisuvira linene mu zinguru zizio; kigira ivi oveeye imbinga yange.

¹⁰ Nyasaye wange yanyanzaa ligali kuvita; alaanziranira alangola ndore vasigu vange nivaguutiywi.

¹¹ O, Nyasaye, utaviita nonoho mba, gase avandu vange valivilira. Uvasalanyie kuzinguru zizio na uvaguuti, O, Yahova, mukingi wiitu!

¹² Uvwoni voveeye ku minwa jaavo; amakuva gaavo gaveeye vuzwa aguvwoni. Leka vagumirwi mu liegingira liavo! Na kigira valama kandi vavehaa,

¹³ uvadivize mu vutima vuvwo vululu; uvadivize ligali. Maku avandu vosi valamanya ndi, ivi Nyasaye wamihaa mu Isiraeli, ndi uvwamihi vwivwe vulandaa kuduuka ku lirova liosi.

¹⁴ Avasigu vange viranaa vuli hamugorova, nivalokaa kuli zimbwa, nivavoyavoya mu lidaala linene liosi,

¹⁵ kuli zimbwa zivoyavoyaa nizienyeleriza viukulia kandi ziayulaa mu lielilira vudiku bei ni zitiiguti.

¹⁶ Navuzwa inzi ndimba lizominywa lie zinguru zizio, vuli mugambazuri, ndimba amakuva gu vuyanzi vuvwo vutali ne keheri. Ivi oveeye uvuhaliru vwange, kandi Imbinga yange mu ing'inga yu vudinyu vwange.

¹⁷ Ndizominya ivi, mukingi wange. Imbinga yange veveeye mu ivi Nyasaye, Nyasaye unyanza.