Zaburi 57 - KITABU KITAKATIFU

Lisaala liu kwenya Vokonyi

¹ O, Nyasaye, ombere zimbavasi kigira nzizanga ku ivi osoore. Nzivisaa mu ivi kuli engoko ivisaa viminyu viayo isi wi zimbaha ziayo kuduuka lwa imbuza yi chihi elekela.

² Inzi nzanira ku Nyasaye oveeye mwigulu ligali, ku Nyasaye uhaanaa ku inzi viosi ivia nyenya.

³ Alativuli kutura mwigulu na alambonyia, alaguuta avadambizi vange. Nyasaye alamanyia vuyanzi vwivwe vutali nekeheri.

⁴ Avasigu vange vamali kungumbiriza, vaveeye kuli zisimba ziveeye ninzara izienyaa kulia avandu. Amiinu gazio gaveeye kuli amatimu kandi mivano ju vuta; na zinimi ziavo ziveeye kuli vivavi viugi.

⁵ O, Nyasaye, ukuminywe igulu wi ligulu, kandi uvukumi vuvwo vulande ku lirova liosi.

⁶ Inzi mbeeye mukivi, kigira avasigu vange vamali kotega mutego gwu kung'umira. Vayavi iliina munzira yange, navuzwa yavo aveene vamali kugwa mulio.

⁷ O, Nyasaye, mwoyo gwange gwituuliyi, mwoyo gwange gwituuliyi ndimba nu kwizominya ivi kazozo!

⁸ Mwoyo gwange gwetegeki! Ndavuka nu kukuba vukana ni lidienyi, inzi ndavuka mugambazuri mu mavwevwe.

⁹ O, Yahova, ndakusandiza hagati hi zihiiri. Ndakwimbira zinyimbu zie lizominya hagati ha vandu.

¹⁰ Vuyanzi vuvwo vutaveeye ne keheri vuduuka mwigulu, kandi uvusuuvirifu vuvwo vuduuka mu malesi.

¹¹ O, Nyasaye, ukuminywe mwigulu igulu, kandi uvukumi vuvwo vove ku lirova liosi.