Zaburi 56 - KITABU KITAKATIFU

Lisaala liu kusuuvira mu Nyasaye

¹ O, Nyasaye, omberere zimbavasi kigira avandu vanzingilira nuvululu ligali. Avasigu vange vandambizaa zing'inga ziosi.

² Avahing'ani vange vanzingilira lidiku liosi, vanguuta kigira vaveeye avanyingi ligali.

³ Lwa mbeeye nuvuti, O, Yahova Wanyala Viosi, mbikaa lisuuvira liange mu ivi.

⁴ Inzi suuviraa mu Nyasaye, na simbeeye nuvuti mba; mwizominyaa kigira likuva lilie ilihonyianga. Mundu vuzwa anyala kongola ki?

⁵ Avasigu vange vambiika muvudinyu, lidiku liosi valohiza kuli vanyara kusaliriza kazozo muvwivisu!

⁶ Vivungiza havundu hivisu nu kohenzeriza chiosi changolaa nivasaviraa kunziza, nivasaaviraa ukunzita.

⁷ O, Nyasaye, uvahe mageri kolondekana nuvudamanu vwavo. Uvadivize mu vutima vuvwo.

⁸ Ivi umanya kuli ngubizangwa ikivi ivi umali kong'oda livaliza lia maliga gange, goosi gang'odwa mu kitabu chicho?

⁹ Ku lidiku lia nzanira ku ivi, avasigu vange valilanywa inyima. Inzi manya yaga ndi: Nyasaye aveeye ku lovega lwange.

¹⁰ Suuviraa mu Nyasaye; kandi nzizominyaa likuva lilie.

¹¹ Suuviraa mu Nyasaye, na sindatia kindu kali kilala mba. Mundu wilikuza anyala kongola ki?

¹² O, Nyasaye ndahaana ku ivi icha ndalagana. Ndahaana ku ivi vihaanwa viange vie lisandiza.

¹³ Ivi umali kombonyia kutura mu likuza, nukuninda mburi kuguutwa. Nandio, ngendaa imbiri woovo, mu vulavu vwakanga ku yavo avaveeye mwoyo.