Zaburi 55 - KITABU KITAKATIFU

Lisaala liu mundu uzamiywi nu mulina weve

¹ O, Nyasaye, hulira lisaala liange; utasuula kuhulira ligoonya liange mba.

² Huliriza lisaala liange na undivulire. Inzi nduhiziywi nu vudinyu vwange.

³ Inzi mbeeye nu vuti kigira litihizwa lia vasigu vange, inzi mali kuguutwa kigira lidambizwa lia vandu vadamanu; vamali koleta uvudinyu ku inzi, vaveeye nu vutima ninzi, kandi vandunyiraa. Mbeeye nu vuti gigira litihiza lia vasigu vange.

⁴ Mbeeye mu vovereri vonene, kandi mbeeye hagati hi litihiza lie likuza.

⁵ Inzi mbeeye nu vuti kandi ni lidegera linene; mbeeye mu vuti vonene ligali.

⁶ Niiva ndakaveeye ni zimbaha kuli ilikuulu, ndakaburuki kuzia ihale no konyoora ovososi.

⁷ Ngano ndakaburuki nu kuzia ihale ligali nu komenya mwigendanyama.

⁸ Ndakaziye vwangu ligali nduuki kwesoora kutura ku kihuzuzi kenene kandi imbuza yi chihi.

⁹ O, Yahova, goyanyia limoloma lia avasigu vange, inzi ndolaa kilage kandi uvutindi mu lidaala linene.

¹⁰ Vakumberizi madigi gi lidaala linene yili mbasu nu vudiku, uvudamanu kandi uvudinyu zing'ano ziosi vizuye mulio.

¹¹ Liononya lie vindu liveeye vuli havundu hoosi, zinzira ziosi ziizuye navandu vu kudambiza kandi vuvugadi.

¹² Niiva yakaveeye musigu ongoleraa kehenyahenye, ngano ndakikuziyi kuye; kandi niiva yakaveeye umuhing'ani wi gingira ku inzi, ngano ndakivisi ihale kutura kuye.

¹³ Navuzwa ni ivi, mundu wachange, mulina wange wa kwayaanzana naye.

¹⁴ Kwali ni livoolerana lilahi nive, kandi kwazia nive mu Litembeli kusigamira Nyasaye.

¹⁵ Avasigu vakuzi inyinga yaavo nikikiri kuduuka, Vazie mu kihadisi nivakikiri mwoyo, kigira uvudamanu vuveeye mu limenya liavo, kandi hagati mu mioyo jaavo.

¹⁶ Navuzwa, inzi ndanira Yahova Nyasaye yangonye, naye alambonyia.

¹⁷ Nzanira ku Yahova vuli mugambazuri, mbasu hagati kandi vudiku, lielilira liange liaduuka kuye naye alahulira.

¹⁸ Nyasaye alahonyia mwoyo gwange kutura ku vulwani vwa nwana na vasigu vange;

¹⁹ Nyasaye uwamiha mihiga ni mihiga, alahulira lianira liange kandi alavaguuta, kigira vavura kugirung'ana, kandi si venya kumutia.

²⁰ Wache wange yingilira avalina veve; umali kuvunaga lilagana lilie.

²¹ Makuva gu munwa gwigwe gaali manulu ligali kuvita isiagi, navuzwa yaali ni livihiliriza mu mwoyo gwigwe. Amakuva geege gaali kuli amaterere gokodotiza, navuzwa gakalagaa kuli vivavi viugi.

²² viika vudinyu vuvwo ku Yahova, naye alakosoola. Sialaleka avalungi veve vaguutwi mba.

²³ O, Nyasaye, oleete aviiti na avagaadi vazie mu kilindwa imbiri wi inusu yi livamwoyo liavo nilikikiri kuduuka. Navuzwa inzi, ndakusuuvira.