Zaburi 50 - KITABU KITAKATIFU

Lisigamira lia Agiligali

¹ Yahova Nyasaye, Wuvunyali, amolomaa. Alangiliraa ku lirova liosi kutura Ivugwi kuduuka Imadioli.

² Nyasaye ang'ereng'anaa kutura ku kiguru cha Ziyoni, lidaala liveeye lilahi ligali kandi liduukiru!

³ Nyasaye wiitu yaazaa nu mufuumu munene, muliru munene gwadukaa imbiri weve, ku zimbega zizie ziosi, alolekaa kuva kuli ikiihi kenene ligali.

⁴ Nyasaye yaza kutura mwigulu, aduuki kukalagira avandu veve imbiri wiligulu ni lirova kuli avalolekizi veve.

⁵ Nyasaye avoora, “Leki avandu vange avasuuvirifu vaze ku inzi, yavo avaloomba lilagana niinzi mu lihaana kisiuvilu.”

⁶ Ligulu liosi limanya ndi, Nyasaye aveeye mulungi, kandi niye umwene ukalagiraa avandu veve.

⁷ “O, avandu vange, hulirizi, na ndamoloma, O, Isiraeli nokolorekiza uvudamanu ku munye; inzi mbeeye Nyasaye Yahova winyu.

⁸ Inzi si ndamugondokera kigira visiuviliru vienyu, kinga vihaanwa vienyu viu kusambwa via muletaa imbiri wange kazozo mba,

⁹ inzi si ndavugilira zigiriki kutura mu milimi jinyu mba, kinga zimburi kutura mu viayo vivio mba.

¹⁰ Zinyama ziosi ziu mimulitu ziveeye ziange, kandi zielefu zie mitugu ku vigulu viosi jiveeye jange.

¹¹ Amanyonyi goosi gu muvwerefu, kandi vilombe vindi viosi iviveeye mu milimi viveeye viange.

¹² “Kali niiva mbeeye ninzara, sindaamuteva chakulia mba, kigira kivala kandi viosi viveeye mu viveeye viange.

¹³ Inzi nyara kulia inyama yi zigiriki? Anoho nyara kunwa amasahi gi zimburi?

¹⁴ Lisandiza lienyu, live kuli ivisuuviliu vienyu ku inzi, Nyasaye winyu kandi muhaane ku inzi Uwanyala Viosi, viosi via mwalaga.

¹⁵ Mwaniri ku inzi mu ing'inga yu vudinyu, na inzi ndamuhonyia, na munyi mulanzizominya.”

¹⁶ Navuzwa Nyasaye avooreraa avachamu ndi, “Kigira ki munyi mwiranira mu livoora amalago gange? Kandi kigira ki muveeye ni limoloma ku lilagana liange?

¹⁷ Munyi mwavura kuhulira amigizu gange, kandi mwasuura amalago gange.

¹⁸ Mwalomba uvulina na vuli aviivi vosi va mwagana navo; kandi mwahambana harara na avaheyi vi zing'ano ziosi.

¹⁹ “Muveeye avetegeke komoloma uvudamanu kazozo, kandi si mwigaya kovora uvugadi.

²⁰ Muveeye avetegeku kuyara avamwavo vinyu, nu kwenyeleriza amahiolo kuvo.

²¹ Munyi mwakora yaga goosi, na inzi si ndavoora kindu ku munyi mba, mwaganagana ndi inzi ndaali kuli munyi. Navuzwa kalunu, inzi mugondokeraa, kandi nu kuhaana likalaga imbiri winyu.

²² “Muhuliri amakuva yaga, munyi avasuuraa inzi Yahova, ni gataveeye ndio, ndamudiviza ligali, kandi sialavaho kali mulala unyala kumuhonya mba.

²³ Lwa muhaanaa lisandiza ku inzi, gaveeye kuli muhanaa visiuvilu viu kuhaana luyali ku inzi, na mulikola ndio, ligali ndahonya yavo vosi avambuliraa.”