Zaburi 5 - KITABU KITAKATIFU

Lisaala liu kwenya kukingwa

¹ Uhuliri lisaala liange, O, Yahova, na uhuliri likenya liange.

² Uhuliri lianira liange kigira vokonyi, O, mwami wange kandi Nyasaye wange! O, Yahova saala ku ivi.

³ Mugambazuri, uhuliraa mwoyo gwange, lwi liuva litongaa mbana lisaala liange ku ivi, nu kulindilira mativuli googo.

⁴ Ivi oveeye Nyasaye utayaanzaa vudamanu, kandi siuvugiliraa uvwoni kuva imbiri woovo mba.

⁵ Avigingiri si valasingira imbiri woovo mba, udunyiraa vandu vosi avachamu.

⁶ Ivi udiviza yavo avavolaa vovehi, kandi uvihilirwa yavo vikirage na avuvugaadi avatindi na aviiti.

⁷ Navuzwa inzi, ndingira munyumba yooyo kigira vuyanzi vuvwo vonene, na inzi ndakusigamira mu Litembeli liilio litakatifu nu kwinamiraa ivi mu vuti vonene ku ivi.

⁸ O, Yahova, unzimiliri mu vulungi vwuvwo kigira avasigu vange, ulungikizi inzira yooyo imbiri wange.

⁹ Avasigu vange si vavola agiligali mba. Zing'anagani ziavo ziveeye ziu kwononyia, amakuva gaavo gaveeye gu vugadi kandi madoto, navuzwa galetaa likuza ligali ku vandu.

¹⁰ O, Nyasaye uvakalagiri kandi uvahe mageri; leka lilohiza liavo lidamanu livadivizi. Uvakungi vatuli imbiri woovo kigira uvwoni vwavo vunyingi kandi liebaala liavo ku ivi.

¹¹ Navuzwa oleke vosi avasuuviraa mu ivi vasangale, leka vimbi nu vusangali kazozo. Uvakingi yavo avayaanzaa ivi vaveeye nu vusangali ligali kigira ivi.

¹² Ivi ugasizaa avalungi imbiri woovo, O, Yahova, vuyanzi vuvwo ulavakinga kuli inguva.