Zaburi 49 - KITABU KITAKATIFU

Uvusiru vwu kusuuvira mu uvutugi

¹ Huliri likuva yili, avandu vosi! Muhulirizi, avandu vosi havundu hoosi.

² Muhulirizi mwosi, avanene ku avakeekeke keleng'ani, avatugi navadaka harara.

³ Iziganagani ziange zilava zielimanya ligali. Inzi molomaa makuva govogeri.

⁴ Ndategiza ugutu gwange ukuhuliriza zing'ano, kandi ndivaala vivuni viazio lwa ngubaa uvukana.

⁵ Simbeeye nuvuti mu zing'inga ziu vuhimwa, lwa ngumbirizwa na vasigu,

⁶ avandu vadamanu avasuuviraa mu vutugi vwavo, vigingiraa kigira uvunyingi vwu vutugi vwavo.

⁷ Mundu umwene sianyala kwitungira mba; sianyala kutunga Nyasaye uvuguli vwi livamwoyo lilie mba,

⁸ kigira mutungu gwi livamwoyo liu mundu goveeye munene ligali. Cha yakatungi si kinyala kuduuka,

⁹ kumukola avuli kukuza, na amenye mihiga ni mihiga.

¹⁰ Mundu woosi anyala kolola ndi; kali avovogeri vakuza, kuli avasiru navayingu vakuza. Vosi valeka vutugi vwavo ku visukululwi viavo.

¹¹ Vilindwa viavo viveeye ovomenyo vwavo mihiga ni mihiga, vamenya uweneyeyo zing'inga ziosi; kali nivaali ku ing'inga ndala ni milimi jaavo aveene.

¹² Ovonene vwu mundu sivunyala kumuhonyia kutura ku likuza mba. Alakuza vuzwa kuli zinyama.

¹³ Henza olole chekoleka ku yavo aviisuuviraa aveene, keheri cha yavo avigingiraa kigira uvutugi vwavo.

¹⁴ Vakalagirwa vakuzi kuli magondi, na likuza lilavahila kuli mwayi ahilaa amagondi geege; valiika vwangu mu kilindwa mulala sa mulala. Miviri jaavo jilagundira mu vilindwa, kihadisi kilava ovomenyo vwavo mihiga ni mihiga kutura yengo wavo.

¹⁵ Navuzwa Nyasaye alasoola. Alambonyia kutura mu zinguru zie likuza.

¹⁶ Utatiihizwa lwu mundu agwizaa mutugi mba, anoho lwi miandu jije jimedekaa ligali kuvita.

¹⁷ Lwa akuzaa sianyala kuvuvugula azie navwo mba; uvutugi vwivwe sivulazia naye mu kilindwa mba.

¹⁸ Kali niiva mundu yigutizwa ni livamwoyo yili, na yizominywa kigira limedeka lie miandu jije,

¹⁹ aliyunga harara na vaguuga veve vosi mu likuza, ahi kisundi kihindiraa mihiga ni mihiga.

²⁰ Ovonene vwu mundu sivunyala kumuhonyia kutura ku likuza mba; alakuza vuzwa kuli zinyama.