Zaburi 48 - KITABU KITAKATIFU

Ziyoni, Lidaala linene lia Nyasaye

¹ Yahova aveeye munene, kandi wukwizominywa ligali, mu lidaala linene lia Nyasaye kandi ku kiguru chiche kitakatifu.

² Ziyoni, kiguru cha Nyasaye, keveeye kitambi kandi kilahi ligali, lidaala linene liu mwami munene, keletaa vusangali ku vandu vosi mu kivala.

³ Nyasaye alindaa zimbinga zizie; umali kwimanyia ndi aveeye mukingi wukusuuvirwa mugati mwizimbinga zie lidaala linene.

⁴ Avami viivungiza harara ma ni vaza kwingilira avandu vi kiguru cha Ziyoni.

⁵ Navuzwa lwa vakelola, vagenya nilidegera linene; vaatia ligali kandi ni viiruka.

⁶ Uwene yeyo vatanga kodegera ligali kigira uvuti kandi vahulira uvuzunu kuli mukali oveeye mu lilumwa;

⁷ wa vadiviza kuli zimeri zia Tarishishi, agahunzulanywa nukuvunanywa ni imbuza yi kiihi kutura ivugwi.

⁸ Kunyi kuhuliyi aga Nyasaye amali kokora, kandi kalunu kumali kukelora mu lidaala linene lia Nyasaye wiitu, Yahova Wanyala Viosi; alalinda lidaala linene mihiga ni mihiga.

⁹ O, Nyasaye, nikoveeye musi mwi Litembeli liilio, kuganagana uvuyanzi vuvwo vutaveeye ne keheri.

¹⁰ Ivi wizominywa na vandu havundu hoosi, kandi luyali lulwo lulandaa ku lirova liosi. Ivi wamihaa ni likalaga lirungi.

¹¹ Leka avandu va Ziyoni vasangale! Ivi uhaanaa likalaga liveeye lirungi; Leka have uvusangari mu madaala manene gi Ivuyuda.

¹² Munyi avandu va Nyasaye, muvodong'ane lidaala linene lia Ziyoni nukuvaliza minaara jalio.

¹³ Heenzi vulahi ku madigi galio, kandi muhenzerizi zimbinga zialio, kunangwa muladuuki kovoolera likula lizaa ndi:

¹⁴ “Nyasaye uyu aveeye Nyasaye wiitu mihiga ni mihiga; alakwimilira ku zing'inga ziosi izizaa.”