Zaburi 45 - KITABU KITAKATIFU

Lwimbu lwe keserero chu mwami

¹ Mwoyo gwange gwizuuyi makuva malahi, ulwa ndohizaa kandi kuhandika lwimbu yilu ku mwami. Nyimbiraa umwami lwimbu yilu, lulimi lwange lwetegeki kwimba lwimbu lulahi, kuli ikalamu yu mung'odi mulahi.

² Ivi oveeye musaza wi ligondo lilahi kuvita avandi vosi. Kandi oveeye mumolomi mulahi ligali Nyasaye akugasizaa kazozo.

³ Weevohe kivavi chicho, mwami wizingulu. Ivi oveeye wuvukumi kandi wuluyali.

⁴ Niina ligare liu vulwani ogende mu vukumi. Kigira likinga lia agiligali kandi likalaga lirungi. Zinguru ziu mukono mulungi zilakokola onyoore liguuta linene.

⁵ Mivano juvuta vuvwo jiveeye miugi ligali; jitozaa mioyo ja vasigu vovo, zihiiri zigwizaa hasi hi virenge vivio.

⁶ Uvwami vwa Nyasaye amali kuha ivi, vulahindira mihiga ni mihiga. Ivi wamihaa avandu vovo nilikalaga lirungi.

⁷ Ivi uyaanzaa uvulungi, udunyiraa uvuchamu. Kigira yaga, yiki ni kigira Yahova, Nyasaye woovo umali kukotovola. Kandi umali kuzuka uvugasu vunyingi ku ivi kuvita mwami wundi woosi.

⁸ Zinguvu zizio zifunyaa mwayu gwa manemane, wundi na kida. Aviimbi vakusangalizaa mu zinyumba ziuvwami, iziasiafa na miinu gi zinzogu.

⁹ Avakaana va vami vaveeye valala ku vakali vinyumba yooyo vuluyali kandi mukali wu mwami usingiyi ku mukono gugwo mulungi; niyiviiki liesiaha lie zahabu indahi ligali.

¹⁰ Omwiha wu mwami, huliriza ku agambooraa, yivilira avandu vovo na viko vovo,

¹¹ uvulahi vwi ligondo liilio vulalomba mwami kukukayirwa; aveeye munene woovo, kunangwa kuduuka umuhuliri.

¹² Avandu kutura mu kivala cha Tiro valakoletera vihaanwa; avandu vatugi valageriza kwenya liyanzilira liilio.

¹³ Mukaana wu mwami aveeye munyumba yu vwami; magu kulia yaagasa ligondo! Inguvu yeeye yalombwa ku zimbusi zie izahabu indahi.

¹⁴ Ni yiviiki inguvu yeeye yuvubalabale, yimilirangwa kuzia ku mwami, nahelekwa na vakana vache vagima; navo kandi valetwa ku mwami.

¹⁵ Vazaa nuvusangali kandi nuvuyanzi nukwingira munyumba yu vwami.

¹⁶ Ivi, mwami wange, ulava navayayi vanyingi, ukuvugula ovogono vwa vaguuga vovo kuli avami; kandi ulavakola vave avami ku lirova liosi.

¹⁷ Ndakora lieta liilio kukuminywa mu makura goosi, kunangwa avandu vosi valakwizominya mihiga ni mihiga.