Zaburi 44 - KITABU KITAKATIFU

Lisaala liu Kwikinga

¹ O, Nyasaye, kunyi kwa huliriza ligali na amatu giitu kutura ku avaguuga viitu, amakuva gi vindu viokogenyia viawakola mu ing'inga yaavo ya kale.

² Wakunga zihiiri ni zinguru ziu mukono gugwo. Maku wavika avandu vovo mu kivala chavo; kandi wahaana amageri ku zihiiri zindi kandi wahaana ku vandu vovo linyola lie miandu minyingi.

³ Avandu vovo sivagutaa kivala yiki ni kivavi chavo mba, sivagutaa ni zinguru zia makono gaavo, mba, navuzwa vaguuta ni zinguru ziu mukono gugwo mulungi, kandi wavasuuviriza kuva navo kazozo kigira wa vayaanza.

⁴ Ivi oveeye mwami wange kandi Nyasaye wange, kandi uhaanaa liguuta ku vandu vovo; visukululwi via Yakobo.

⁵ Kunyi kwa guuta avasigu viitu, kuvitira kuzinguru zizio, kwaduvaga nukwita avasigu viitu.

⁶ Inzi simbeeye ni lisuuvira kohona kigira uvuta anoho ikivavi change okombonyia mba.

⁷ Navuzwa ivi umali kokohonyia kutura ku vasigu viitu, kandi nu kuvaguuta ligali yavo avakudunyiraa.

⁸ Kunyi kulizominya kazozo nu kuhaana lisandiza ku ivi mihiga ni mihiga.

⁹ Navuzwa kalunu, ivi umali kokoleka kandi umali kukuviika mu liguutwa, sinzizaa harara na mahi giitu kuzia kulwaana avasigu viitu mba.

¹⁰ Ivi wakokola kwiruki kutura ku vasigu viitu, kandi navo valanya miandu jietu.

¹¹ Wakokola kuva kuli magondi agahilwa kwitwa. Wakusalanyia mu kivala cha vandu vi zihiiri.

¹² Ivi umali kuguliza avandu vovo ku mabese makekeeke, na siwenya uvuguli vwi gulu kuvo mba.

¹³ Ivi wakokola nikololeka kuva linyegwa ku vatende tiitu, vakosekerizaa ni vakokolera kehenyahenye.

¹⁴ Ivi okokoli lichaywa hagati hi zihiiri; va kusungusiraa mitwi jaavo mu likosekeliza.

¹⁵ Inzi ndeganyiangwa kazozo.

¹⁶ Kigira kutura ku lihulira amakuva ga manyego ni lisekerizwa lia vasigu vange, ni lilegerizwa, kandi yavo avandunyira.

¹⁷ Vindu yivi viosi vimali kokoleka ku kunyi, kali ndio sikwakwivilira mba, anoho sikwaleka lilagana lia walomba ni kunyi mba.

¹⁸ Kunyi sikwavula kuva avasuuvirifu ku ivi mba, anoho sikwavula kuhulira amalago googo mba.

¹⁹ Navuzwa wakoleka hagati hi zinyama ziu mwigendanyama, kandi wakukunika ni chiriri chi likuza.

²⁰ Niiva kwaali nikwivilira kusigamira Nyasaye wiitu, nu kusaala ku avanyasaye vandi,

²¹ ivi Nyasaye wiitu waali unyala kumanya, kigira ivi umanya zing'anagani zietu ziu muvuvisi.

²² Navuzwa kigira ivi, kunyi kwitwa kazozo, koveeye kuli amagondi gu kwitwa.

²³ O, Yahova, yaanza okokonye, utaleka avasigu viitu vakudambizi mihiga ni imihiga mba.

²⁴ Huliriza lianira lietu ni lisaala lietu mu vudinyu, kigira ki wivisaa kutura ku kunyi ni lisalira lietu. Kigira ki wiviliraa lisalira lietu kandi lidambizwa lietu?

²⁵ Miviri jietu jikiziywi hasi mu luguchi, kogoni mu malova nikuguutiywi.

²⁶ Hamba okokonye! Kigira vuyanzi vuvwo vutaveeye ne keheri; okohonyie!