Zaburi 42 - KITABU KITAKATIFU

KITABU CHA KAVIRI Zab. 42—72 Lisaala liu mundu oveeye mu vuhambe

¹ Kuli kisusu yegombaa mugera gwa mazi makindu, O, Nyasaye, ni ndio ngwegomba. Nindio nzegomba ivi, O, Nyasaye wange!

² Mbeeye nuvuluhu ku ivi, Nyasaye oveeye mwoyo. Nyara kuzia ng'inga ki mu Litembeli nukusigamira yo imbiri woovo?

³ Ndiraa mbasu nuvudiku, amaliga gange gaveeye chukulia change cheng'ine. Avasigu vange vandeva zing'inga ziosi, “Nyasaye woovo aveeye haliha?”

⁴ Mwoyo gwange guzunangwa novovereri vonene ligali lwa nzizuliza kuli ndaziza nu muganda gwa vandu mu Litembeli lia Nyasaye ni mbimiliraa mu zimbaso lwa vagenda nivimba nukuhanzuka zinyimbu zie lizominywa ku Nyasaye.

⁵ Kigira ki mbereraa ligali? Kigira ki ngubizwa kivi? Ndasuuvira mu Nyasaye kandi ndamwizominya, muhonyi wange kandi Nyasaye wange.

⁶ Mwoyo gwange gwizuuyi ovovereri, O, Nyasaye nzizuliza ivi, kutura mu kivala cha Jorodani, kandi kutura ku kiguru cha Herimoni na Mizari.

⁷ Luliva lulangaa luliva. Viguvuli vivio vilulu vimali kungunika nukuvitira ku inzi. Kuli inyanza enene yuvutima, anoho kihilira kihumaa.

⁸ Yahova umanyie uvuyanzi vwivwe vutaveeye nekeheri ku ing'inga ya mbasu; kunangwa nduuki kwimba lwimbu lwu kumwizominya ha vudiku. Lwimbu yilu love kuli lisaala ku Nyasaye ombezaa livamwoyo.

⁹ Mboraa ku Nyasaye, oveeye mukingi wange, mboraa, “Kigira ki umali kunzivilira? Kigira ki inzi nzizagiliri kusalira kutura ku lidambizwa lilulu lia vasigu vange?”

¹⁰ Mali kuduvulanyiywa ligali na manyego gaavo, lwa vazizagiliraa kondeeva, “Nyasaye woovo aveeye haliha?”

¹¹ Kigira ki mbereraa ligali? Kigira ki ngubizwa ikivi? Inzi ndasuuvira mu Nyasaye kandi ndamwizominya kandi, Muhonyi wange kandi Nyasaye wange.